Қарийб 16 йил давом этган очлик акциясини ўтган йили якунлаган ҳиндистонлик активист аёл Иром Шармила Манипур штатининг қонун чиқарувчи мажлисига сайловларда бор-йўғи 90 та овоз тўплаб, қақшатқич мағлубиятга учради. Бу ҳақда Марказий сайлов комиссиясига таяниб, «РИА Новости» хабар берди.
Шармила сайловда ўзининг «Халқ тикланиши ва адолат партияси» номидан штатнинг амалдаги бош вазири Окрам Ибоби Сингх билан битта округда қатнашди.
Овозларнинг якуний ҳисоб-китобларига кўра, Шармила атиги 90 та овоз тўплади, Сингхга эса 18,5 минг киши овоз берди. Шармила бошқа бир нечта номзоддан кейинги ўриндагина жойлашди.
Шармила бундай натижани кутмаганини ва сайловларда бошқа иштирок этмоқчи эмаслигини айтди.
«Мен ўз номзодимни илгари сурганимдан уялмаяпман, лекин менга сайловлар етади, келажакда бошқа қатнашмайман. Аммо менинг партиям ўз фаолиятини давом эттиришини истайман», — деди Шармила.
Иром Шармила 2000 йил 5 ноябрда 28 ёшида қуролли кучларнинг махсус ваколатлари тўғрисидаги қонуннинг бекор қилинишига эришиш ниятида очлик эълон қилган эди. Активист аёл баҳсли қонун бекор қилинмагунича овқат ейиш, сув ичиш, соч тараш ва ойнага қарашдан бош тортди. Аммо уч кундан кейиноқ уни «ўз жонига қасд қилишга уриниш»да айблаб, ҳибсга олишди. Аёлнинг соғлиғи ёмонлашгани туфайли, ҳукумат унга нисбатан мажбуран озиқлантириш процедурасидан фойдаланди.
Изоҳ (0)