Буюк Британия Евроиттифоқ таркибидан чиққач, ҳамжамиятдан Европа инвестиция банкида сақланаётган 9 миллиард фунт стерлинг (11 миллиард доллар)ни унга қайтариб беришни талаб қилади. Бу ҳақда The Sunday Times Лондон ва Брюссель ўртасида Brexit шартлари ҳақида музокаралар бошланишидан аввал ҳукумат сўрови билан қилинган эксперт-ҳуқуқий хулосага таяниб маълум қилди, деб ёзади «ТАСС».
Ҳукмрон Консерватив партиядан адвокат Мартин Хоув томонидан тайёрланган ҳужжатда таъкидланишича, «ҳукумат нафақат Брюсселга нимадир тўлаш учун ҳеч қандай ҳуқуқий мажбуриятларга эга эмас, балки Евроиттифоқ ҳам Буюк Британияга унинг Европа инвестиция банки капиталидаги иштироки улушини ҳам қайтариб бериши керак». Британиялик ҳуқуқшуносларнинг ҳисоб-китобларига кўра, бунда гап 9—10 миллиард фунт стерлинг ҳақида бормоқда.
Аввалроқ ОАВлар европалик музокарачиларга таяниб, Евроиттифоқ Лондондан аввалроқ ўз бўйнига олган мажбуриятлар (хусусан, Евроиттифоқ амалдорларининг пенсия тўловлари бўйича) сифатида 60 миллиард фунт стерлинг тўлашни талаб қилмоқчи эканлигини маълум қилган эди. Кейинроқ Британия газеталари мамлакат бош вазири Тереза Мэй уни тўлаш ниятида эмаслиги ҳақида ёзганди.
Изоҳ (0)