12 март, якшанбага ўтар кечаси Грузиянинг Батуми шаҳри марказида тартибсизликлар юзага келди, аммо полиция ва махсус топшириқли бўлинмалар у ердаги вазиятни тўлиқ назорат қилмоқда, деб ёзади «Интерфакс» маҳаллий ОАВларга таяниб.
Бир неча соат аввал қирғинлар уюштирган акция иштирокчилари энди кўчаларда йўқ. Ўт ўчириш машиналари етиб келиб, ёқиб юборилган ахлат қутилари, шунингдек, фуқаро ва полиция автомобилларидаги алангаларни ўчирмоқда.
Махсус топшириқли бўлинмаларнинг фаол ҳаракатлари бошланишидан олдин Грузия бош вазири Георгий Квирикашвили телеэфир орқали чиқиш қилиб, Батумидаги ҳуқуқ-тартибот органлари «минимал жавоб кўрсатиш режимида турганлигини» айтди. Бош вазир Батумидаги тартибсизликларни ташкиллаштиришда «қўпорувчилик кучлари»ни айблади, улар вазиятни ёмонлаштиришга уринганини айтди.
Шаҳардаги тартибсизликлар 11 март, шанба куни кечқурун полициячилар олти нафар маҳаллий фуқарони ҳибсга олгач, бошланди. Тартибсиз равишда тўпланган митинг иштирокчилари полиция бошқармаси биносига бостириб киришга уринди, аммо махсус топшириқли бўлинмалар кўзни ёшлантирувчи газ ва резина ўқлардан фойдаланиб, бунга йўл қўймади. Тўқнашувлар натижасида бир неча киши, шу жумладан, полициячилар жабрланди.
Грузия ички ишлар вазири қўлга олинган олти фуқаро озод этилганини, аммо улар маъмурий жавобгарликка тортилишини маълум қилди.
Изоҳ (0)