Tesla ва SpaceX компанияси раҳбари Элон Маск Жанубий Австралия штатидаги энергия таъминоти муаммосини энергияни тежовчи аккумлятор тизимини қуриш орқали ҳал қилишга ваъда берди.
Тадбиркорнинг маълум қилишича, агар ишни 100 кун ичида тугата олмаса, объектни давлатга бепул топширади. Бу ҳақда The Guardian нашрига асосланиб, «Vc.ru» хабар берди.
Гап қуввати 100 мегаватт/соат бўлган батареяли тизимнинг қурилиши ҳақида бормоқда.
9 мартда Tesla’нинг вице-президенти Линдон Рив компания штатдаги энергия таъминотидаги узилишларни ҳал қилишга имкон берувчи 100—300 мегаватт/соат қувватли батареяларни ишга тушириши мумкинлигини маълум қилди.
Жанубий Австралияда электр тизимида аввалроқ юз берган носозликлар таъминотдаги доимий узилишлар ва нарх ўзгаришларига сабаб бўлди. Рив эса компания янги тизимни 100 кун ичида тайёрлаши мумкинлигини таъкидлаб ўтди.
Шундан сўнг австралиялик миллиардер, Atlassian компаниясининг бош директори Майк Кеннон Брукс Элон Маскдан Twitter орқали Tesla’нинг баёноти қанчалик жиддий экани ҳақида сўради.
Маск унинг компанияси тизимни шартнома имзоланганидан бошлаб 100 кун ичида ишга тушириши, агар тизим ўз муддатида ишга тушмаса, объект штат раҳбариятига бепул топширилишини маълум қилди.
2016 йилда Tesla қуввати 90 мегаватт/соат батареяли худди шундай тизимни Калифорнияда 90 кун ичида ишга туширган эди. Унинг қиймати 100 миллион долларни ташкил қилади.
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)