«Тошшаҳартрансхизмат» акциядорлик жамияти фуқародан келиб тушган мурожаатни ўрганиб чиқиб, иш вақтида қўл телефонидан фойдаланган 58-автобус ҳайдовчисини ишдан бўшатди. Бу ҳақда Facebook’даги «Водители Ташкента» гуруҳининг ташкилотга шикоят қилган аъзоси маълум қилди.
Маълум бўлишича, у «Тошшаҳартрансхизмат»нинг электрон почтасига 58-йўналиш автобуси ҳайдовчиси бошқарув пайтида телефондан фойдаланганлиги ҳақида ва TashBus мобил дастури орқали бошқа йўналишли автобуслар ҳаракатини назорат қилиб, йўналиш интизомини ва ҳаракат хавфсизлиги қоидаларини бузганлиги ҳақида мурожаат юборган.
Гуруҳ аъзоси постга илова қилган, «Тошшаҳартрансхизмат» АЖ бошқарув раиси жўнатган хатда айтилишича, «автокорхона ходимлари томонидан бу ҳолат чуқур таҳлил қилиниб, оралиқ бекатларда меъёрдан ортиқ турмаслик, тезликни оширмаслик, автобусларнинг санитар ҳолати, GPS-трекерларга сунъий таъсир кўрсатмаслик, автобусни бошқариш пайтида қўл телефонларидан фойдаланмаслик ва йўловчилар билан хушмуомала бўлиш ҳақида ҳайдовчи ва чиптачилар билан йўриқнома ўтказилган».
«Автокорхонада бундай ҳолатларнинг олдини олиш ва ҳайдовчиларга ибрат бўлиш мақсадида… 58-йўналиш ҳайдовчиси билан тузилган меҳнат шартномаси бекор қилинди», — дейилади хатда. Шунингдек, унга буйруқ нусхаси ҳам илова қилинган.
Изоҳ (0)