Навоий вилоятининг Учқудуқ туманида Наврўз байрами арафасида янгиланган «Келажак» ёшлар марказини очиш режалаштирилмоқда, деб ёзади «Газета.uz».
Хабарда айтилишича, Ўзбекистон Президенти Шавкат Мирзиёев 2016 йил ноябрда Навоий вилояти сайловчилари билан сайловолди учрашувида 2014 йилдан буён фаолият юритиб келаётган ёшлар марказини реконструкция қилиш ва кенгайтириш ташаббусини қўллаб-қувватлаган эди. Навоий кон-металлургия комбинати бош директори Қувондиқ Санақулов буйруғи билан қурилиш-монтаж ишлари декабрь ойида бошланди.
Объект реконструкциясига НКМК Марказий кон бошқармаси ва Шимолий кон бошқармасининг Зарафшон қурилиш бошқармаси ходимларидан 150 дан ортиғи жалб қилинган. Реконструкцияга комбинат маблағларидан 1 миллиард сўмга яқин ажратилган.
Янгиланган марказда 200 кишилик янги фаоллар зали, кутубхона ва тренажёр зали пайдо бўлади. Йигит-қизлар бу ерда тикиш, тўқиш, қуббачилик, карвинг бўйича тўгаракларда шуғулланиши ҳамда рус, инглиз ва корейс тилларини ўрганиши мумкин.
Изоҳ (0)