Ўзбекистонда 2017 йилда 199 та инвестиция лойиҳаси доирасида 4,505 миллиард доллар ҳажмидаги хорижий инвестициялар жалб этилиши режалаштирилмоқда. Бу ҳақда «Газета.uz» хабар берди.
Президент Шавкат Мирзиёев қарори билан тасдиқланган жорий йил инвестиция дастурига кўра, чет эл кредитлари ҳисобига ҳукумат кафолати билан 79 лойиҳа бўйича 1,854 миллиард доллар, тўғридан-тўғри хорижий инвестициялар эвазига 120 лойиҳа асосида 2,65 миллиард доллар ўзлаштирилади.
Хорижий инвестицияларнинг энг катта қисми (37 лойиҳа бўйича 2,47 миллиард доллар) ёқилғи-энергетика тармоғига тўғри келади. Улардан чет эл компаниялари тўғридан-тўғри инвестициялари ҳисобига нефть-газ соҳасига 20 лойиҳа доирасида 1,97 миллиард доллар киритилади.
Жумладан, Россиянинг «Лукойл» компанияси 2017 йилда умумий қиймати 8 миллиард доллардан ошиқ бўлган икки келишув бўйича 1,217 миллиард доллар инвестиция қилади. Gazprom International шўъба тизими бўлган Gas Project Development Central Asia Устюрт минтақаси ва Сурхондарё вилоятида 1,3 миллиард долларлик икки лойиҳани амалга оширади.
Энергетика тармоғида хорижий кредитлар ҳисобига 17 лойиҳа асосида 506,7 миллион доллар ўзлаштирилади. Mitsubishi Corporation ва Mitsubishi Hitachi Power Systems (Япония) Наманган вилоятининг Тўрақўрғон туманида қуввати 900 мегаватт бўлган иссиқлик электр станцияси қурилиши ва Навоий ИЭС учун 450 мегаваттли буғ-газ қурилмаси ўрнатишга киришади. Хитойнинг Zhuhai Singyes Green Building Technology компанияси Самарқанд вилоятида қуёш электр станцияси қурилишини бошлайди.
Маълумот учун, 2016 йил якунлари бўйича Ўзбекистонга жалб этилган хорижий инвестициялар ва кредитлар ҳажми 11,3 фоизга кўпайди ва 3, 7 миллиард доллардан ошди.
Изоҳ (0)