Ўзбекистон Ҳарбий-ҳаво кучлари Собиқ иттифоқ даврида ишлаб чиқарилган ва эскирган ҳарбий самолётлар ва вертолётларни сотувга қўймоқда, деб ёзади «Nuz.uz».
Сўнгги кунларда Американинг Собиқ иттифоқ даврида ишлаб чиқарилган ҳарбий техникани сотиш билан шуғулланувчи Redfish Trading Company компанияси қатор самолётларни сотувга қўйгани ҳақида маълумот пайдо бўлди, дейилади хабарда. Нашр «Topwar.ru» порталига таяниб ёзишича, бунда гап еттита МиГ-29, бешта Су-27 қирувчилари, битта Су-25 ҳужумчи самолёти ва 22 та Су-17 қирувчи-бомбардимончи самолётлар ҳақида бормоқда. Маълумотда улар Ўзбекистон ҲҲКга тегишли эканлиги айтилади.
Нашр таҳририяти Ўзбекистон Мудофаа вазирлигига мурожаат қилганида, жанговар самолётлар сотилгани фактини қисман тасдиқлашди. Гап шундаки, республикада жанговар техника савдоси билан «Ўзмахсусимпекс» ихтисослашган ташкилоти ёпиқ тендер асосида шуғулланади.
Мудофаа вазирлиги ҳақиқатан ҳам ушбу ташкилотга мурожаат қилиб, штатдан ташқари эскирган техникани сотишни таклиф этган, аммо айни пайтгача тендер ғолиби аниқланганича йўқ, бутун техника доимий таянч базаларида қолмоқда.
Ҳарбий муассаса вакиллари маълумотларига кўра, эскирган жанговар вертолётлар ҳам сотувга қўйилмоқда, аммо Мудофаа вазирлигининг янги техника сотиб олиш бўйича режалари йўқ.
Изоҳ (0)