Пенсионерлар ва ижтимоий нафақа олувчиларга қўшимча қулайликлар яратиш мақсадида, хусусан, уларнинг пенсия ва нафақа миқдори ҳамда тўлов муддати тўғрисида маълумотни реал вақт режимида мобил қурилмалар ёрдамида олишга мўлжалланган янги интерактив SMS-сўров хизмати жорий қилинди. Бу ҳақда бюджетдан ташқари Пенсия жамғармаси матбуот хизмати хабар берди.
Бугунги кунда пенсия, ижтимоий нафақа, компенсация ва бошқа тўловларни тайинлаш ва тўлаш жараёни Ўзбекистон Республикаси Молия вазирлиги ҳузуридаги бюджетдан ташқари Пенсия жамғармаси туман (шаҳар) бўлимлари томонидан замонавий веб-технологияларни қўллаш асосида ишлаб чиқилган автоматлаштирилган ПК «Пенсия» дастури ёрдамида амалга оширилмоқда.
Пенсия ва ижтимоий нафақа миқдори ҳамда тўлов муддати тўғрисида маълумот олиш учун 10711 рақамига пенсионер ёки нафақа олувчининг пенсионерлик гувоҳномасида кўрсатилган шахсий ҳисобварақни (етти рақамдан иборат) SMS-сўров сифатида юбориш лозим.
Мазкур интерактив хизматни жорий этиш учун Пенсия жамғармаси ва тегишли контент провайдер билан шартнома тузилган.
SMS-сўров бўйича тақдим этиладиган маълумотлар контент провайдер ва мобил алоқа оператори томонидан пуллик хизмат (ҳар бир SMS-сўров баҳоси $0,02) асосида амалга оширилади.
Изоҳ (0)