Чемпионлар лигаси гуруҳ босқичида 14 та ўйиндан буён юта олмаётган Сергей Лушчан Мессини олиб келишларини сўради

Сергей Лушчан «Бунёдкор» бош мураббийи бўлгач, клубни кетма-кет уч бор Чемпионлар лигасининг гуруҳ босқичига олиб чиқди. Бироқ ўтган давр мобайнида гуруҳ доирасида 14 та ўйин ўтказиб, битта ҳам ўйинда зафар қучмади.

Ўтказилган 14 та ўйиннинг 4 тасида дуранг ўйнаган «қалдирғочлар», 10 тасида имкониятни бой бериб қўйди. Сергей Лушчан эса сўнгги мағлубиятдан кейин жамоада ғалаба руҳияти борлиги ҳақида айтди.

Йигитлар сўнгги дақиқаларда 10 киши бўлиб ҳужумга ўтди. Демак, жамоада ғолиблик руҳияти бор. Менга катта пул беринглар, Месси билан Чемпионлар лигасида ғолиб чиқаман.

Сергей Лушчан, «Бунёдкор» бош мураббийи

Лионель Месси ёрдамида Ўзбекистонда фаолият олиб бораётган қолган мутахассислар ҳам Чемпионлар лигасида ғолиб чиқиши мумкинми ёки йўқ — Лушчан томонидан ойдинлик киритилмаган.

Акром Комилов ҳақида

«Ал-Айн»га қарши Тошкентда бўлиб ўтган ўйинда ҳимоячи Акром Комилов қизил карточка олди ва жамоадошларини майдонда бир киши кам қолдирди.

Ҳозир кийим алмаштириш хонасига бордик, Акром у ерда йўқ эди. Уни излашга одам юбордим, чунки хавотирдаман. Комилов жуда яхши ўйинчи, шунчаки бироз қизиққон.

Биз унга жазо беришимиз мумкин, бироқ бундан фойда чиқади деб ўйламайман. У ўсмирлар ва ёшлар терма жамоаларида ҳам қизил карточка олган. Бу унинг нозик нуқтаси.

Сергей Лушчан, «Бунёдкор» бош мураббийи

Сардор Рашидов ҳақида

Сергей Лушчан плей-оффда «Ал-Жаиш» довонидан ўтиб олингач, Дилшод Аҳмадалиев Сардор Рашидовни «еб қўйгани»га ойдинлик киритганди. Бироқ гуруҳ босқичининг кетма-кет икки турида Аҳмадалиев ҳеч кимни «еб қўйгани» йўқ, чунки «Бунёдкор» кетма-кет икки ўйинда жами 5 та гол ўтказиб юборди. Аввалроқ Сардор Рашидов Лушчанни нопрофессионалликда айблаганди.

Мен «сариқ матбуот»ни ўқимайман. Сардор шундай деган бўлса, майли, барчани унинг виждонига ҳавола.

Бизда шундай йигитлар бор. Масалан, Нурилло Тўхтасинов. У келажакда етакчи бўлиши мумкин. Ҳозир эса бизда яхши плеймейкер йўқлигини тан оламан.

Сергей Лушчан, «Бунёдкор» бош мураббийи

Сергей Лушчан матбуотнинг қайси турини кузатиб бориши ва «сариқ матбуот»нинг ичига қайси нашрлар киришини айтиб ўтмаган.

Маълумот учун, аввалроқ Сергей Лушчан асосан ёшларга эътибор бераётгани учун ёши катта футболчилардан воз кечаётганига ойдинлик киритганди. Бироқ шундан кейин «Бунёдкор» 33 ёшли ҳимоячи Душан Мичич билан шартнома тузди ва унга асосий таркибдан жой топиб берди. Лушчан принципида футболчининг ёшида фақат ўзбекистонликларга урғу берилганми ёки бунда хорижлик футболчилар ҳам ҳисобми, ойдинлик киритилмаган.