Актриса Дилноза Кубаева «Дарё» интернет-нашри учун эксклюзив интервью берди. Интервьюни журналист Феруз Муҳаммад уюштирди.
Суҳбат давомида актриса бугунги кунда фаолият олиб бораётган ёш актрисалар, уларнинг ўзини тутиши, кийиниши ва ўйнаётган ролларига муносабат билдирди, уларнинг қайси жиҳатларини алоҳида эътироф қилиши мумкинлигини айтиб ўтди.
Қизларимиз жуда ҳам яхши, жуда ҳам чиройли, муомалали, лекин уларга мен ўйнаган роллар ҳам келмаяптими, деб ўйлаб қоляпман. Кўп қизларимиз бўлар-бўлмас фильмларда суратга тушмоқда. Ижодкор, актёр-актриса, санъаткор, қўшиқчи ўзини сал соғинтириб туриши керак деб ўйлайман. «Мен фалончи жойдаман, мен мана бунақа иш билан бандман, бундай кийиндим», деб ўзини кўз-кўз қилиш ҳам сал хунукроқ ҳолат. Қизларимизни қизғанаман.Дилноза Кубаева билан эксклюзив интервьюнинг тўлиғини қуйида томоша қилишингиз мумкин. Актриса суҳбат давомида кинода камнамолиги сабаблари, ҳаётидаги унутилмас кунлар, биринчи ва охирги муҳаббати ва бошқа мавзулар ҳақида тўхталиб ўтган.Биз чиққанда томошабинлар: «Вой, овозини баландроқ қил», деб кўриши қайдаю, «Ҳа, анави куни интернетда ҳам шу кийимда эди», деб кўриши қаерда. Ҳамма нарсада ҳам ўзини кўрсатиб, ҳар хил клипларда, ҳар хил бўлар-бўлмас нарсаларда чиқаверишни сингилларимга маслаҳат бермаган бўлардим. Танлаб-танлаб, чиройли, ўзига мос, кейинги чиройли таклифлар бўлишига замин яратиб юритишларини хоҳлайман.
Интервьюларда ҳам гапираётган гапларини ҳам ўйлаб гапиришса, ҳар хил олди-қочди сўзларни эмас, халқ билан учрашувларда раҳматли шоирларимиз Абдулла Орипов, Эркин Воҳидов ижодидан шеърлар айтишса, бундан ташқари Маҳмуд Тоир, Иқбол Мирзо каби шоирларимиз ижодидан мисоллар келтиришса, монологлар ёки афоризмлардан иқтибос келтиришса — қандай яхши. Учрашувларда: «Мен кеча ушбу афоризмни ўқиб, жуда таъсирландим, шуни сиз билан баҳам кўрмоқчиман», дейиш қаердаю, «Нима саволинглар бор, саволинглар бўлса жавоб бераман», деб гап бошлаш қаерда — тўғриси, бундай гап билан савиямиз пастлигини билдириб қўйишимиз мумкин.
Кийиниш одобида ҳам ўзбек аёли қандай бўлган, оналаримиз қанақа бўлган — шу нарсаларга ҳам бироз эътибор беришимиз керак, деб ўйлайман. Ёнимизда эркакларимиз бўлади, ака-укаларимиз, фарзандларимиз бўлади — уларнинг олдида ҳам ўзимизни ноқулай ҳис қилмайдиган шароитда бўлишимиз керак.
Дилноза Кубаева, актриса
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)