Aktrisa Dilnoza Kubayeva “Daryo” internet-nashri uchun eksklyuziv intervyu berdi. Intervyuni jurnalist Feruz Muhammad uyushtirdi.
Suhbat davomida aktrisa bugungi kunda faoliyat olib borayotgan yosh aktrisalar, ularning o‘zini tutishi, kiyinishi va o‘ynayotgan rollariga munosabat bildirdi, ularning qaysi jihatlarini alohida e’tirof qilishi mumkinligini aytib o‘tdi.
Qizlarimiz juda ham yaxshi, juda ham chiroyli, muomalali, lekin ularga men o‘ynagan rollar ham kelmayaptimi, deb o‘ylab qolyapman. Ko‘p qizlarimiz bo‘lar-bo‘lmas filmlarda suratga tushmoqda. Ijodkor, aktyor-aktrisa, san’atkor, qo‘shiqchi o‘zini sal sog‘intirib turishi kerak deb o‘ylayman. “Men falonchi joydaman, men mana bunaqa ish bilan bandman, bunday kiyindim”, deb o‘zini ko‘z-ko‘z qilish ham sal xunukroq holat. Qizlarimizni qizg‘anaman.Dilnoza Kubayeva bilan eksklyuziv intervyuning to‘lig‘ini quyida tomosha qilishingiz mumkin. Aktrisa suhbat davomida kinoda kamnamoligi sabablari, hayotidagi unutilmas kunlar, birinchi va oxirgi muhabbati va boshqa mavzular haqida to‘xtalib o‘tgan.Biz chiqqanda tomoshabinlar: “Voy, ovozini balandroq qil”, deb ko‘rishi qaydayu, “Ha, anavi kuni internetda ham shu kiyimda edi”, deb ko‘rishi qayerda. Hamma narsada ham o‘zini ko‘rsatib, har xil kliplarda, har xil bo‘lar-bo‘lmas narsalarda chiqaverishni singillarimga maslahat bermagan bo‘lardim. Tanlab-tanlab, chiroyli, o‘ziga mos, keyingi chiroyli takliflar bo‘lishiga zamin yaratib yuritishlarini xohlayman.
Intervyularda ham gapirayotgan gaplarini ham o‘ylab gapirishsa, har xil oldi-qochdi so‘zlarni emas, xalq bilan uchrashuvlarda rahmatli shoirlarimiz Abdulla Oripov, Erkin Vohidov ijodidan she’rlar aytishsa, bundan tashqari Mahmud Toir, Iqbol Mirzo kabi shoirlarimiz ijodidan misollar keltirishsa, monologlar yoki aforizmlardan iqtibos keltirishsa — qanday yaxshi. Uchrashuvlarda: “Men kecha ushbu aforizmni o‘qib, juda ta’sirlandim, shuni siz bilan baham ko‘rmoqchiman”, deyish qayerdayu, “Nima savolinglar bor, savolinglar bo‘lsa javob beraman”, deb gap boshlash qayerda — to‘g‘risi, bunday gap bilan saviyamiz pastligini bildirib qo‘yishimiz mumkin.
Kiyinish odobida ham o‘zbek ayoli qanday bo‘lgan, onalarimiz qanaqa bo‘lgan — shu narsalarga ham biroz e’tibor berishimiz kerak, deb o‘ylayman. Yonimizda erkaklarimiz bo‘ladi, aka-ukalarimiz, farzandlarimiz bo‘ladi — ularning oldida ham o‘zimizni noqulay his qilmaydigan sharoitda bo‘lishimiz kerak.
Dilnoza Kubayeva, aktrisa
“Daryo”ning Telegram’dagi rasmiy kanali — @toshqindaryo’ga a’zo bo‘ling!
Izoh (0)