«Бировга айтсанг ишонмайди. Лекин шундай бўлди». Президентдан совғага Captiva олган сурхондарёлик Шоди бобо

Шавкат Мирзиёев жорий йилнинг 10—11 февраль кунлари Сурхондарё вилоятига ташрифи давомида Ангор туманидаги Занг гиламбоб қишлоғида Шоди бобо Хўшбоқов хонадонида бўлиб, отахон ва у кишининг умр йўлдоши Саломат момо билан суҳбатлашди, деб ёзади ЎзА.

«Давлатимиз раҳбарининг уйимизга келгани, дилдан мулоқот қилгани, ҳол-аҳвол сўраганига ҳали ҳам ишонгим келмайди. Тавба дейман, шунча ишдан ортиб оддий фуқаролар хонадонига бориш, у билан гурунг қилиш, турмуши, шароити, ўй-фикрлари билан қизиқиш учун одам қанчалар бағрикенг бўлиши керак экан-а, деб ўйлайман-да», – дейди Шоди бобо.

«Ўзингиз қаранг-да, умри бино бўлиб даладан бошқасини кўрмаган одам мамлакат Президенти билан ўз уйида гурунг қилиб ўтирса, бировга айтсанг ишонмайди. Лекин шундай бўлди. Давлатимиз раҳбари билан оиламизнинг кундалик турмуши, маҳалламиз ҳаёти, фарзанду набиралар тарбияси, ўқиши, иши, деҳқончилик сирлари, юртимизда юз бераётган ўзгаришлар, хуллас, ҳамма нарса ҳақида гаплашдик», — дейди Шоди бобо.

Шоди бобо Хўшбоқов бу йил 84 ёшни қарши олди. Ҳали бардам, фикри теран, хотираси мустаҳкам. Болалиги Иккинчи жаҳон уруши йилларига тўғри келган Шоди бобо тенгдошлари қатори не-не қийинчилигу машаққатларни бошидан ўтказди. Ўспиринлик даврида уруш асоратларини қалбан ҳис этди, очарчиликни кўрди. Ҳалол меҳнат қилиб, деҳқончилик сирларини ўрганди.

Умр йўлдоши Саломат момо Раҳимова билан 8 ўғил, 2 қизни тарбиялаб, вояга етказди. Ўғиллари қўли гул уста, ҳунарманд бўлди. Ўттиздан ортиқ невара, йигирмага яқин чевара қуршовида пиру бадавлат ҳаёт кечираётган отахон ва онахон бугунги осойишта ва обод ҳаётга шукрона келтиради, эл-юртга тинчлик сўраб дуо қилади.

Шоди бобо Хўшбоқов фарзандлари ва невараларига ҳам деҳқончилик сирларини обдан ўргатиб, уларга ерга меҳр бериш зарурлиги, ҳалол меҳнат орқасидан рўзғор тебратиш лозимлигини уқтирган. Ўтган йили отахон томорқада етиштирилган картошкадан 25 миллион сўмдан ортиқ даромад олгани бунинг яққол тасдиғидир.

«Президентимиз уйимиздан қайтгач, бизга мамлакатимизда ишлаб чиқарилган Captiva машинасини совға қилиб юборибдилар. Кўп яшасин. Бошимиз кўкка етди, кўнглимиз тоғдек кўтарилди. Бу кампир икковимизнинг умримизда олган энг улуғ совға бўлди. Ҳа, ўзини билган одамга бундан ортиқ эътибор, бундан ортиқ ғамхўрлик бўлмайди-да. Бундан фахрланаман», — дейди Шоди бобо.

«Дарё»нинг Telegram’даги расмий канали — @toshqindaryo’га аъзо бўлинг!