Қонунчилик палатасида Олий Мажлис ҳузуридаги нодавлат нотижорат ташкилотлари ва фуқаролик жамиятининг бошқа институтларини қўллаб-қувватлаш Жамоат фонди маблағларини бошқариш бўйича парламент комиссиясининг навбатдаги йиғилиши бўлиб ўтди. Бу ҳақда «1news.uz» хабар бермоқда.
Йиғилишда фонднинг 2016 йилги фаолияти сарҳисоби эшитилди ҳамда 2017 йилдаги устувор вазифалар белгилаб олинди.
Ўтган йили давлат бюджет маблағлари ва бошқа манбалар ҳисобидан жамланган 12,2 миллиард сўм парламент комиссиясининг қарорлари асосида давлат грантлари, давлат ижтимоий буюртмалари шаклида ажратилди. Улар нодавлат нотижорат ташкилотлари, ОАВ ва фуқаролик жамияти бошқа институтларининг 275 та лойиҳа ва дастурларини молиялаштиришга йўналтирилди.
Йиғилишда 2017 йилда ННТ, ОАВ ва фуқаролик жамиятининг бошқа институтлари лойиҳа ва дастурларини давлат томонидан молиявий қўллаб-қувватлаш шакллари, маблағлар миқдори ва устувор йўналишлар муҳокама қилинди.
«Халқ билан мулоқот ва инсон манфаатлари йили» Давлат дастури ҳамда 2017-2021 йилларда Ўзбекистон Республикасини ривожлантиришнинг бешта устувор йўналиши бўйича Ҳаракатлар стратегиясида белгиланган вазифаларни амалга ошириш бош йўналиш қилиб белгиланди. Шу мақсадда 2017 йилда республика бюджетидан 12 миллиард сўм миқдорида маблағ ажратилади.
Парламент комиссияси аъзолари давлат бюджетидан ажратилиши режалаштирилган маблағнинг 5 миллиард 330 миллион сўмини ННТ, ОАВ ва фуқаролик жамиятининг бошқа институтлари лойиҳаларини давлат грантлари шаклида қўллаб-қувватлашга йўналтириш ҳамда бунинг учун йил давомида 5 та танлов ўтказишга келишиб олди.
ННТ ва фуқаролик жамияти институтларининг йирик ижтимоий аҳамиятга молик бўлган аниқ умумижтимоий муаммоларни ҳал этишга қаратилган лойиҳаларига давлат ижтимоий буюртмасини жойлаштириш учун 2,4 миллиард сўм ажратилади. Етакчи жамоат ташкилотларини қўллаб-қувватлашга 4 миллиард 270 миллион сўм йўналтирилади.
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)