17 февраль куни Буюк Британиянинг Ўзбекистондаги Элчиси жаноб Крис Аллан Буюк Британия ва Ўзбекистон дипломатик алоқаларининг 25 йиллигига бағишланган матбуот анжуманини ўтказди. Бу ҳақда Буюк Британиянинг Тошкентдаги элчихонаси хабар берди.
Элчи жаноблари Ўзбекистонлик ва хорижий журналистларга Буюк Британия ва Ўзбекистон дипломатик алоқаларининг 25 йили ичида, ва айниқса 2016 йилда қандай муваффаққиятларга эришгани тўғрисида сўзлади. Элчи жаноблари икки томонлама муносабатларнинг бугунги ҳолати ва эртанги истиқболлари ҳақида сўз юритди.
2017 йил 18 февраль куни Буюк Британия ва Шимолий Ирландия Бирлашган Қироллиги ва Ўзбекистон Республикаси ўртасида дипломатик алоқаларнинг ўрнатилишига 25 йил тўлди.
«Албатта, давлатларимиз ўртасидаги муносабатлар бундан-да узоқроқ тарихга бориб тақалади. Қирол Генрих IV ва Амир Темур ўртасидаги бундан деярли 600 йил аввалги даврга оид ёзишмалар сақланиб қолган. Лекин фақатгина Ўзбекистон Мустақилликка эришгандан сўнггина бу алоқаларимиз доимий тус олди», — дейилади хабарда.
Бугунги кунда икки томонлама алоқалар сиёсий, тижорий, хавфсизлик, таълим ва маданият каби кўплаб соҳаларни ўз ичига қамраб олган.
Изоҳ (0)