АҚШ Халқаро тараққиёт агентлиги (USAID) «Қишлоқ хўжалигида қиймат занжирини ривожлантириш» (АВC) лойиҳаси доирасида Ўзбекистон Қишлоқ ва сув хўжалиги вазирлиги билан ҳамкорликда «Мева ва сабзавотчиликда совутгич омборхоналари: бугунги ҳолат ва Ўзбекистонда ривожланиш истиқболлари» мавзусида амалий семинар ўтказди. Бу ҳақда «Дарё»га АҚШнинг Ўзбекистондаги элчихонаси матбуот хизмати маълум қилди.
Тадбирдан кўзланган асосий мақсад Ўзбекистонда совутгич омборхоналари саноатининг келгусидаги ривожини муҳокама этишдан иборат. Соҳада фаолият олиб бораётган 70 нафар тадбиркор ҳамда 30 дан зиёд давлат органлари, хусусий сектор ва халқаро ташкилотлар вакиллари йиғилган анжуманда АҚШнинг Ўзбекистондаги элчиси Памела Спратлен нутқ сўзлади.
Совуқхона мева ва сабзавотлар сифатининг бузилишини секинлаштириб, сотилишидан олдин улар сақланиши мумкин бўлган муддатни узайтирган ҳолда фермерларга йил давомида истеъмолчилар талабларини қондириш ҳамда уларни бозорда яхши нархларда сотишга кўмак беради. Ўзбекистон ҳукуматининг 2011 йил 7 апрелда имзоланган, имтиёзли солиқ тизими, божхона тартибларини соддалаштириш, халқаро молия муассалари ёрдамида кредит олишни кенгайтиришга қаратилган қарори соҳа ривожига туртки берди.
USAID 2011 йилдан буён совутгич заҳиралари бўйича турли амалий машғулотлар ўтказиш, 300 нафардан зиёд совутгич омборхона раҳбарлари учун юқори даромад келтирувчи технологияларни маҳаллий шароитда фойдаланишга мослаштириш, истеъмолчилар учун маҳсулотларни юқори сифатда ишлаб чиқарилишини таъминлаш мақсадида ўзаро ташрифлар ҳамда миллий алмашув дастурларини ташкил этган ҳолда соҳани қўллаб-қувватлаб келмоқда.
«Умумжаҳон совутгич омборхона имкониятлари»нинг 2016 йилги ҳисоботига кўра, Ўзбекистон совутгич омборхоналар ҳажми бўйича энг яхши 20 мамлакат рўйхатига киритилди.
Ўзбекистон қисқа вақт ичида юқори натижаларга эришди. Унинг бу соҳада дунё бўйлаб кучли 20 та мамлакат қаторига киргани қувонарлидир. Бу нафақат истеъмолчиларга йил давомида қишлоқ хўжалиги маҳсулотларидан баҳраманд бўлиш, балки фермерларга олис бозорларда ўз маҳсулотларини яхши нархларда сотиш имкониятини ҳам яратади. Ўзбекистон яқин келажакда ушбу соҳада энг яхши 10 та мамлакат қаторига қўшилади, деб умид қиламан.«Дарё»нинг Telegram’даги расмий канали — @toshqindaryo’га аъзо бўлинг!Ричард Трейси, Умумжаҳон совутгич заҳиралари уюшмасининг халқаро дастурлар бўйича директори
Изоҳ (0)