Ўзбекистон Президенти Шавкат Мирзиёев Сурхондарё вилоятига сафари давомида 10 февраль куни Ангор туманидаги Занг гиламбоб қишлоғида Шоди Бобо Хушбоқов хонадонида меҳмон бўлган эди.
Учрашув давомида Шавкат Мирзиёев: «Сиз каби кўпни кўрган, юзидан нур ёғилиб турган отахон ва онахонлар жамиятимизнинг мустаҳкам замини, юртимизнинг файзу баракасидир», — деган эди.
«Хонадон эгалари давлатимиз раҳбари халқ ичига кириб, одамларнинг фикрини ўрганаётганидан юртдошларимиз жуда мамнун бўлаётганини таъкидлади. Одамлар оғирини енгил қилиш, турмушини янада фаровон этиш борасидаги улкан, тизимли ишлари учун Президентимизга самимий миннатдорлик билдирди», — дейилган эди мазкур учрашув ҳақидаги ЎзА ахборотида.
16 февралдан бошлаб Facebook’нинг ўзбекистонлик автоҳаваскорлар фаол бўлган «Водители Ташкента (Drivers.uz)» гуруҳида Шоди бобонинг зарбоф тўн кийиб, Captiva машинаси билан тушган суратлари тарқала бошлади.
Суратларнинг бирида Captiva Ўзбекистон Президенти томонидан Шоди бобо Хушбоқов хонадонига совға қилингани айтилган.
Мазкур хабарлар ва фотосуратлар ҳозирча бирор бир расмий манба томонидан тасдиқланганича йўқ.
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)