Хонанда Райҳон: Оилам ҳазил-мутойиба учун мавзу бўлишини истамайман

Ўзбекистонда хизмат кўрсатган артист Райҳон 20—24 февраль кунлари «Истиқлол» санъат саройида навбатдаги яккахон концерт дастурини тақдим этади. Концерт арафасида журналист Феруз Муҳаммад хонанданинг ижодий фаолияти, шоу-бизнес янгиликларига муносабати ва шахсий ҳаёти ҳақида Райҳон билан суҳбатлашди.

— Сизнингча ким кўпроқ рекламага пул сарфлайди — Сизми ёки Лола, Шаҳзода, Муниса Ризаевами?— Мен бошқа санъаткорларни муҳокама қилмайман ва реклама қанча туришини ҳам билмайман. Мен ижод одамиман, ижод билан шуғулланаман. Саҳна безаклари, мусиқий материаллар, вокал, рақслар, либослар, экран учун видеотасвирлар, ҳаракатлар кетма-кетлигини бирга ўйлаб топамиз. Концерт — машаққатли меҳнат талаб этадиган жараён.

— Ҳеч қандай рекламасиз неча йил мухлисларнинг ёдидан чиқмаслик мумкин деб ўйлайсиз?— Ижодий жараённи рекламасиз қанча ушлаб туриш мумкин? Менимча, барча санъаткорлар янада фаол ижод қилиш орқалигина «ижоддаги умрлари»ни узайтириши мумкин. Масалан, аксарият марҳум санъаткорлар айнан ўз ижоди билан ҳали ҳам ҳаёт. Шу туфайли, санъаткор ва реклама — бошқа-бошқа қутблардаги тушунчалардир.

— Давлат телеканалларида деярли кўриниш бермайсиз, лекин уларни ҳам кузатиб борасизми ёки кузатувингиз «Менинг юртим», «Milliy TV» билан чекланганми?— Ҳозир телевизор кўришга деярли вақтим йўқ. Имкон бўлса, «Milliy TV»ни кузатиб бораман.

— Ўз вақтида кинода ҳам рол ўйнаган эдингиз. Сизни яна кинода кўришимиз мумкинми?— Менинг асосий касбим — хонандалик, ундан ортсам, актрисалик қилишим мумкин. Лекин ҳозирча бунга вақт йўқ.

— «Миллион», «Дизайн» ва бошқа кулгу жамоалари ўз ҳазил-чиқишларида сиз ва Йигитали мавзусига кўп бора мурожаат қилган. Бу ҳолат, балки, Сиз ва Фарҳод Алимовга нисбатан ҳам давом этиши мумкин. Бу ҳазилларга қандай муносабатдасиз?— Менинг оилам ҳазил мавзуси бўлишини истамайман.

— «Истиқлол» санъат саройида 10 мартадан ортиқ концерт бергансиз. Қайси бири энг қийин бўлган ва қийинчилик нимадан иборат эди?— Бўлажак концертим, Худо хоҳласа, ҳисоб бўйича 14-яккахон дастурим. Ҳар бир концерт машаққатли, униси ё буниси осон ёки қийин бўлди, деб бўлмайди. Барига улкан тайёргарлик кўрилади. Жисмоний ва руҳий жиҳатдан оғир жараён. Аслида, бу сенинг бир йиллик ижодинг тақдимоти. Айнан яккахон концертида санъаткор ўзини тўла намоён этиши мумкин. Қўшиқ бир эпизод бўлса, концертда сен бутун қобилиятингни — актёрлик маҳоратидан тортиб вокал, рақсгача кўрсатишинг, уларни уйғунлаштира олишинг керак.

— Сўнгги икки йилликда кимларнинг концертига, ҳақиқатдан мухлис бўлиб, билет сотиб олиб кирдингиз?— Ҳамкасб дўстларим концертларига доим бораман. Шу кунларда Филипп Киркоров концертига бормоқчиман.

— Сиз катта умид боғлаган, катта пул сарфлаган, аммо натижасиз тугаган ижод маҳсулларингиз бўлганми?— Ҳар қандай қўшиққа жуда кўп куч ва маблағ сарф бўлади. Ҳар қандай қўшиққа руҳингни бахш этасан. У хит бўладими ёки йўқ — буниси Худодан. Мен ўзимдан талаб қилинганини бажараман, уёғи тақдирга ҳавола.

— Концертингиз ҳақиқатдан ҳам ажойиб ўтади. Ҳар бир қадам, ҳатто олинадиган нафас ҳам худди олдиндан пухта ўйлангандек. Битта дастурга қанча вақт тайёргралик кўрасиз?— Ғоя бир йил давомида шакллантирилади. Тайёргарликка эса ярим йил кетади.

— Нима деб ўйлайсиз, концерт қўйиш ва кўп кунлик концерт бериш ҳам қандайдир рейтингни белгилаб берадими? Агар белгилаб берса, энди Озодбек Назарбековнинг рейтинги тушиб кетадими?— Озодбек аканинг рейтингига келадиган бўлсак, буни муҳокама қилмайман. Концерт кунлари рейтингга умуман таъсир қилмайди. Концерт савияси, сифати, сен нима бера олишингдан, нима куйлаётганингдан, ҳаракатларингдан рейтинг пайдо бўлади. Менимча, Озодбек ака мамлакат мусиқа маданиятига ўзининг шундай салмоқли ҳиссасини қўшдики, ҳеч нарса, ҳатто концерт кунлари ҳам аҳамиятга эга эмас.

— Яна неча йил концерт дастурингизни тақдим қилишингиз мумкин? Кун келиб Шаҳзода сингари етти кун, Озодбек Назарбеков каби 21—25 кунлаб концерт беришингиз мумкинми?— Яна такрорлайман — мен бошқа санъаткорларни муҳокама қилмайман. Концертим кунларини ўзим хоҳлаганимдек, кучимдан келиб чиқиб белгилайман. Мен концертга боримни бераман, жисмонан тикланиб олишимни ҳисобга олиб, беш кун концерт қўймоқчиман.

Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.