«Дарё» интернет-нашри «Ксеронусха» лойиҳаси доирасида 23 декабрь куни Maroon 5 нинг «Sugar» қўшиғига ишланган клип билан Илҳом Фармоновнинг «Яшанг» композицияси видеосини таққослаган эди.
Таққос якунида америкалик хонанданинг бутун бошли ажойиб тарихга эга клипи Ўзбекистонда хизмат кўрсатган артистнинг жамоаси томонидан қарийб нуқта-вергулигача кўчирилгани, афсуски, ўз исботини топган эди.
Мавзуга доир: Ксеронусха: Maroon 5’дан «илҳом олган» Илҳом Фармонов
Эътиборингизга Германияда машҳур ҳисобланган «Лейбниц» печеньесининг 125 йиллигига бағишлаб суратга олинган реклама ролигини ҳавола қиламиз. Ролик 2016 йил 10 апрелида YouTube’га қўйилган бўлиб, ҳозирга қадар 4,2 миллиондан ортиқ марта кўрилган:
Энди ўзбекистонлик хонандалар — Шаҳзода ва Шоҳруххон томонидан куйланган «Алло» қўшиғига ишланган клипни томоша қилинг. Бу клип «Лейбниц»нинг рекламаси чиққанидан қарийб олти ярим ой ўтиб — 2016 йил 24 октябрида YouTube’да эълон қилинган, лекин унга жуда ҳам ўхшаш:
Уч дақиқадан кўпроқ давом этадиган «Алло»даги бош қаҳрамон худди «Лейбниц»нинг 96 сонияли рекламасидаги болакай сингари қўлида қўғирчоқ кўтариб олган:
Германия ролигида ҳам, Ўзбекистон клипида ҳам бола уни бекатда калака қилган бошқа тенгдошлари билан урушади ва юзи тирналади. Бир хил нуқтада қарийб бир хил чандиқ:
Болакай оёғидан жароҳатланган дугонасининг олдига йўл олган бўлади. Оригинал видео ва унинг ўзбекча муқобилида қизалоқлар бошқа-бошқа томонга қараб ётибди, лекин, қизиғи, иккисининг ҳам ўнг оёғи гипсланган:
Болакай дугонасига балерина ҳайкалчасини совға қилади. Ҳар иккала клипда:
Оёғи гипсланган қизча совғани хурсандчилик билан қабул қилади (немис қизалоғи, табиийки, бу вақтда печенье еяётган бўлади, лекин ўзбек клипидаги «печенье» сал кейинроқ кўриниш беради):
Германия ва Ўзбекистоннинг ўхшаш клипларида ҳатто балериналар бир хилда рақсга тушади:
Мана, ўзбек клипидаги «печенье» — хонанда Шаҳзода «болалик» вақтида олган совғасини қўлга олиб, ажиб хотираларга берилмоқда (немисча клипда ҳам шундай манзара акс этган, фақат у ерда Шаҳзода йўқ):
Албатта, бу хамир учидан патир — бунда нафақат «Алло»даги ўхшаш кадрлар, балки хорижий видеоклипларнинг ўзбекистонлик ижодкорлар томонидан кўчирилиши ҳам назарда тутилмоқда.
«Ксеронусха»нинг кейинги чиқишларида нафақат хонандалар, балки Ўзбекистондаги корхоналар ҳам ўз тарғибот видеоларини тайёрлашда хорижий усталардан «нуқта-вергулигача илҳом олиши» кўрсатилади.
Агар «ксеронусха» қилинган клиплар, фильмлар, қўшиқлар ва бошқа ижодий маҳсулотлар ҳақида маълумотга эга бўлсангиз, Telegram’даги «Toshqin ‘Daryo’» канали админларига: «Мен ‘ксеронусхачилар’ни биламан!», — деб мурожаат қилишингизни сўраймиз.
Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)