Ўзбекистон халқ таълими тизимида раҳбар ва педагог кадрлар малакасини ошириш учун Абдулла Авлоний номидаги Марказий институт, 14 та ҳудудий халқ таълими ходимларини қайта тайёрлаш ва уларнинг малакасини ошириш институти, мактабгача таълим ходимларини қайта тайёрлаш ва уларнинг малакасини ошириш ўқув-методик маркази ҳамда болалар-ўсмирлар спорт мактаблари ходимларини қайта тайёрлаш ва уларнинг малакасини ошириш маркази фаолият олиб бормоқда. Бу ҳақда Халқ таълими вазири Улуғбек Иноятов маълум қилди.
Масофадан малака оширишнинг замонавий методлари жорий этилган. Биргина 2016 йил давомида 93 мингдан ортиқ раҳбар ва педагог 140 та малака тоифаси асосида ўз малакаларини оширган. Айни пайтда раҳбар ва педагог кадрлар малакасини ошириш мазмуни ва сифатига қўйиладиган давлат талабларини такомиллаштириш мақсадида хорижий мамлакатлар тажрибаси ўрганилиб, халқ таълими тизимида малака ошириш мазмуни ва сифатига қўйиладиган давлат талабларини, ўқув режа ва дастурларини такомиллаштириш бўйича таклифлар тайёрланмоқда.
Бундан ташқари, Қорақалпоғистон Республикаси, вилоятлар ва Тошкент шаҳри, ҳар бир туман миқёсида «Маҳорат мактаблари» ташкил этилиб, мунтазам ўтказиб борилаётган машғулотларга барча фан ўқитувчилари қамраб олинган. Бу машғулотларда педагоглар тажрибали тренер ўқитувчилардан дарсга тайёргарлик кўриш, кўргазмали қуроллар тайёрлаш, янги мавзуни тушунтириш, ўқувчилар ва ота-оналар билан ишлаш, умуман, касбга оид барча йўналишлар бўйича кенг амалий билимларни ўзлаштирмоқда.
Шунингдек, вазир ўқув режа ва дастурларни тубдан қайта кўриб чиқиш масаласига алоҳида эътибор қаратган ҳолда, келгусида бу борадаги вазифалар ижросини таъминлаш юзасидан режалаштирилаётган ишлар хусусида тўхталди.
«Айни пайтда амалиётчи педагоглар, олий ўқув юртларининг профессор-ўқитувчиларидан иборат ишчи гуруҳлари кўмагида умумий ўрта таълимнинг такомиллаштирилган давлат таълим стандартларини яратиш ва ўқув дастурларини ишлаб чиқиб, ўрнатилган тартибда амалиётга жорий этишга киришилди. Янгича талаб асосида ишланган дарсликлар мажмуа тариқасида (дарслик, мультимедиа иловаси, ўқитувчи учун методик қўлланма) бўлиб, илғор педагогик ва ахборот технологияларига асосланади», — деди у.
Методик хизматнинг ўқитувчи эҳтиёжига асосланган янги шаклларини яратиш, таълим сифатини баҳолаш жараёнига ахборот-коммуникация технологияларни кенг татбиқ этиш ҳам бу йилдаги муҳим вазифалардан ҳисобланади.Улуғбек Иноятов Ўзбекистон Республикаси Президентининг 2016 йил 29 декабрдаги «2017–2021 йилларда мактабгача таълим тизимини янада такомиллаштириш чора-тадбирлари тўғрисида»ги қарори ижроси ҳақида гапирди. Унинг айтишича, 2017—2021 йилларга мўлжалланган кенг кўламли комплекс тадбирларни амалга оширишни кўзда тутадиган мазкур Дастурга мувофиқ, 2200 та мактабгача таълим муассасасининг моддий-техник базасини мустаҳкамлаш, қишлоқ жойларда мактабгача таълим муассасаларини янгидан қуриш, замонавий талабларга жавоб берадиган инвентар, жиҳозлар, ўқув-методик қўлланма ва мультимедиали воситалар билан таъминлаш режалаштирилган.
Янги лойиҳа асосида бунёд этиладиган муассасаларда қулай шароитга эга ёзги айвончалар, сузиш бассейнларини қуриш кўзда тутилган. Ушбу тадбирларни амалга ошириш учун жами 2,2 триллион сўм ажратилиши кўзда тутилмоқда.Дастур доирасида 5-6 ёшли болаларни мактаб таълимига тайёрлаш бўйича муқобил шаклларни яратиш ва ривожлантириш ишлари ҳам амалга оширилади. Яъни, мамлакат бўйича мактабгача таълим муассасаларида 6100 та қисқа муддатли гуруҳ ташкил этилади. Уларни, биринчи навбатда, қишлоқ жойларда ташкил этишга эътибор қаратилади.
Бундай гуруҳларда мактабгача ёшдаги болалар учун турли ривожлантирувчи амалий машғулотлар олиб борилади. Шу асосда ҳар йили 305 мингдан ортиқ 5-6 ёшдаги болаларни мактаб таълимига сифатли тайёрлаш имконияти яратилади.
Бундан ташқари, мактабгача таълимга қамраб олинмаган 3—6 ёшли болаларни уларнинг ота-оналарини методик қўлланмалар билан таъминлаш орқали мактаб таълимига тайёрлаш тизими ҳам жорий этилади.
Изоҳ (0)