Тошкентда «Оролбўйи минтақаси учун инсон хавфсизлиги бўйича кўпшериклик фондини ташкил қилиш орқали Орол фожиасидан зарар кўрган аҳолининг турмуш шароити салоҳиятини мустаҳкамлаш» янги Қўшма Дастурини ишга туширишга бағишланган расмий тадбир бўлиб ўтди. Бу ҳақда «Дарё»га БМТнинг Ўзбекистондаги ваколатхонаси мутасаддилари маълум қилди.
Мазкур тадбирда иштирок этиш ва миллий ҳамкорлар билан учрашиш учун Инсон хавфсизлиги бўйича бўлим раҳбари Меҳрназ Муставафи ва Инсон хавфсизлиги бўйича мақсадли фонд (БМТИХМФ) вакили Мартейн Далхаийжендан иборат БМТ миссияси Ўзбекистонга ташриф буюрди.
Тадбир давомида Орол инқирозининг асоратлари, уларнинг ечимини топишда Ўзбекистон ҳукумати БМТнинг Ўзбекистондаги ваколатхонаси билан ҳамкорликда амалга ошираётган чора-тадбирлар ҳақида тақдимотлар ва маърузалар орқали хабар берилди. Қатнашчилар 2012—2016 йилларда БМТИХМФ маблағи ҳисобига Қорақалпоғистонда амалга оширилган биринчи Қўшма Дастур натижалари билан таништирилди.
БМТнинг Ўзбекистондаги агентликлари ташаббуси билан ишлаб чиқилган янги Дастур БМТИХМФнинг молиявий кўмаги ҳамда уни амалга оширилишида иштирок этаётган агентликларнинг ички ресурслари ҳисобига молиялаштирилади.
Мазкур Дастурда инсон хавфсизлигини таъминлашга, Орол инқирози асоратларининг салбий таъсирига дучор бўлган ҳудудлар аҳолисига алоҳида эътибор берилган. Дастурнинг энг аҳамиятли вазифаларидан бири турмуш тарзи сифатини яхшилаш, аҳоли учун даромад олиш имкониятларини кенгайтиришдир. Шуни алоҳида қайд этиш жоизки, БМТ дастурида «Халқ билан мулоқот ва инсон манфаатлари йили» ҳукумат дастуридаги асосий устувор йўналишлар, Оролбўйи минтақасини 2017—2021 йилларда ривожлантириш бўйича давлат Дастуридаги вазифалар ўз аксини топган.
Янги Дастурнинг муҳим мақсадларидан бири Оролбўйи минтақасида инсон хавфсизлигини таъминлаш бўйича халқаро кўпшериклик фондини тузиш ҳисобланади. Тузилаётган фонднинг фаолияти, биринчи навбатда, мазкур йўналишдаги ташаббусларни ҳамда ҳудуд ривожининг яхлит Дастури шаклида халқаро ҳамжамият томонидан сармоялаштирилаётган молиявий маблағларни мувофиқлаштириш учун самарали механизмни ишлаб чиқишга йўналтирилади.
Ўзбекистонга келган БМТ миссияси Қорақалпоғистон Республикасига ташриф буюриш, тақдимотлар ўтказиш, Қўшма Дастурда назарда тутилган муҳим тадбирлар ўтказиладиган мақсадли туманлар билан танишишни режалаштирмоқда. Инсон хавфсизлиги Концепциясининг мазмуни ҳақидаги батафсил ахборотни мутахассислар 16 февраль куни маҳаллий идоралар, вазирликлар ва халқаро ташкилотлар вакиллари иштирокида пойтахтда ўтадиган семинар чоғида тақдим этади.
Тадбир якунида янги ташаббус доирасида сувга оид лойиҳани амалга ошириш борасида Ўзбекистондаги БМТТД ва Швейцариянинг ривожланиш ва ҳамкорлик агентлиги ўртасида ўзаро ҳамкорлик ҳақидаги шартнома имзоланди.
Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)