Ўзбекистон Президенти Шавкат Мирзиёев Сурхондарёга сафари давомида Термиз шаҳри ва Шеробод туманидаги янги ишлаб чиқариш корхоналари лойиҳалари билан танишди. Бу ҳақда ЎзА хабар бермоқда.
«Жануб текстиль» компаниясида ташкил этиладиган тўқимачилик маҳсулотлари ишлаб чиқарадиган корхона ишга туширилиши 350 иш ўрни яратиш имконини беради. Корхонада йилига 5 минг тоннадан ортиқ ип-калава ишлаб чиқариш режалаштирилган.
2018 йилда ишга тушириладиган «Амудар Текс» Ўзбекистон—Англия қўшма корхонаси йилига 7 минг тонна ип-калава ишлаб чиқариш қувватига эга бўлади. Бу ерда 300 киши иш билан таъминланади. 10 миллион доллардан ортиқ қийматдаги тўқимачилик маҳсулотлари экспорт қилинади.
Sherobod Textile Invest компаниясида ўрнатиладиган замонавий технологиялар йилига 17 минг тонна ип-калава ишлаб чиқариш имкониятини яратади. Корхона қурилишига 46 миллион доллар маблағ сарфланади. Шеробод туманининг «Сеплон» қишлоқ фуқаролар йиғини ҳудудида бунёд этиладиган корхона ишга туширилиши билан 700 киши иш билан банд бўлади.
Шавкат Мирзиёев мазкур саноат корхоналари пахтани қайта ишлаш ва тайёр маҳсулот ишлаб чиқаришда истиқболли лойиҳалар бўлиб, вилоят иқтисодиётини барқарор ривожлантиришда муҳим аҳамият касб этишини таъкидлади.
Президент, шунингдек, Термиз шаҳрида барпо этилаётган ғўзапоя ва қамишдан ДСП ишлаб чиқариш корхонаси лойиҳаси ҳам билан танишди. «Термиз таъминот» компанияси негизида барпо этилаётган корхонада йилига 30 минг кубметр ДСП маҳсулотлари ишлаб чиқариш режалаштирилган. 4,2 гектар майдонда 2,9 миллион доллар эвазига қад ростлайдиган янги мажмуада 160 иш ўрни яратилади.
Шавкат Мирзиёев шу ернинг ўзида «Ўзқурилишматериаллари» ва «Комфорт инерт сервис» компаниялари ҳамкорлигида ташкил этилаётган гранит ва габбро тошларидан қурилишбоп пардозлаш плиталари ишлаб чиқариш, Термиз механика заводини кенгайтириш лойиҳалари билан ҳам танишди.
Йилига 80 минг квадрат метр гранит маҳсулотлари ишлаб чиқариш қувватига эга бўладиган пардозлаш плиталари корхонасида 205 иш ўрни яратиш режалаштирилган.
«Навоий кон-металлургия комбинати» давлат корхонаси томонидан амалга оширилаётган Термиз механика заводини кенгайтириш лойиҳаси қишлоқ хўжалиги маҳсулотларини қайта ишлаш корхоналарини арзон, сифатли асбоб-ускуна ва эҳтиёт қисмлар билан таъминлайди. Фермер хўжаликлари ва соҳага ихтисослашган корхоналарнинг электр двигателлари, асбоб-ускуна ва жиҳозларини, насосларни сифатли таъмирлайди. Мева-сабзавот маҳсулотларини тозалаб қуритадиган қулай ва ихчам технологияларни ишлаб чиқариб, фермерларга етказиб беради.
Янги корхонанинг тўла қувват билан ишга туширилиши вилоятда етиштирилаётган озиқ-овқат маҳсулотларини қайта ишлаш кўламини кенгайтириб, замонавий усулда қадоқлаш ва истеъмолчиларга етказиб беришда муҳим омил бўлади. Корхонада 80 дан ортиқ иш ўрни яратилади.
«Президентимиз янги корхоналарни замон талабларига мос технологиялар билан жиҳозлаш, маҳсулотларни нафақат ички бозорга, балки экспортга йўналтириш чораларини кўриш лозимлигини таъкидлади. Мутасаддиларга тегишли топшириқлар берди», — дейилади ЎзА ахборотида.
Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)