Ўзбекистон Президенти Шавкат Мирзиёев Термиз шаҳрида бунёд этиладиган кўп қаватли арзон, замонавий уй-жойлар, деҳқон бозори ва савдо комплекси, замонавий истироҳат боғи лойиҳалари билан танишди. Бу ҳақда ЎзА хабар бермоқда.
2016 йил 22 ноябрдаги Президент қарорига мувофиқ, Термиз шаҳрида 34 етти қаватли арзон уй-жой бунёд этилиши белгиланган. Имтиёзли ипотека кредити асосида бериладиган икки, уч ва тўрт хонали 5 та уй Султон Саодат кўчасида бунёд этилмоқда.
210 хонадонга мўлжалланган замонавий уйлар учун ўн гектар ер ажратилган. Лойиҳага кўра, бу ерда иккита мактабгача таълим муассасаси, савдо ва маиший хизмат кўрсатиш объектлари, маҳалла маркази қурилади.
«Президентимиз янги уйларни энг улуғ, энг азиз байрам – Ватанимиз мустақиллигининг 26 йиллигигача фойдаланишга топшириш, уларда аҳолининг яшаши учун барча шароит яратиш бўйича зарур кўрсатмалар берди», — дейилади ЎзА хабарида.
Термизнинг Навоий кўчасида қуриладиган деҳқон бозори ва савдо комплекси лойиҳасига 40 миллиард сўм маблағ йўналтирилиши режалаштирилган.
Комплексда деҳқон бозори павилёнлари, иккита кўп қаватли замонавий супермаркет, автомобиллар турар жойи қуриш ва йил охиригача фойдаланишга топшириш мўлжалланмоқда.
Термиз шаҳрида ёшлар боғи барпо этилади. Ўзбекистон Президенти боғ лойиҳаси билан танишар экан, мазкур боғни шаҳар аҳолиси фарзандлари билан сайр қиладиган, ҳордиқ чиқарадиган масканга айлантириш зарурлигини таъкидлади. Шу нуқтаи назардан лойиҳани яна бир бор синчиклаб кўриб чиқиш лозимлиги қайд этилди.
Шавкат Мирзиёев Сурхондарё бўйида бунёд этилаётган «Амударё» болалар соғломлаштириш маркази, бу ерда болажонлар учун ташкил этиладиган инфратузилма объектлари лойиҳаси билан ҳам танишди. Шунингдек, шу куни Президент Сурхондарё вилоятидаги Халқ қабулхонасини ҳам бориб кўрди.
Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)