«Абитуриент» газетасининг биринчи сони чиққанига 10 йил тўлгани муносабати билан, нашр таҳририяти ташаббуси остида, давлат ва жамоат ташкилотлари, оммавий ахборот воситалари вакиллари ва абитуриентлар тайёрлаш соҳаси мутахассислари иштирокида конференция ташкил этилди.
«Абитуриент»: кеча, бугун ва эртага» деб номланган тадбир нафақат газетанинг 10 йилликдаги фаолиятини сарҳисоб қилиш ҳамда келажакка режалар тузиш бўйича мутахассислар томонидан тақдим этиладиган фикр-мулоҳазалар ва эксперт хулосаларини ўрганиш, балки Ўзбекистон олий таълим муассасалари кириш имтиҳонларига абитуриентларни тайёрлаш соҳасидаги долзарб масалаларни муҳокама этиш имконини берди.
«Ўрта махсус касб-ҳунар таълими соҳаси мутахассислари, Ўзбекистоннинг турли ҳудудларида фаолият олиб бораётган ўқув марказлари, абитуриентлар учун мўлжалланган босма нашрлар, журналистлар ва ОАВ вакилларининг фаол иштироки тадбир муваффақиятига муносиб ҳисса қўшди», — дейилади тадбир ташкилотчилари хабарномасида.
Замонавий баҳолаш технологиялари, абитуриентлар билимини аниқлаш бўйича жаҳон тажрибасини ўрганиш, муқобил тестлар тузиш ва уларни ечиш бўйича абитуриентларда кўникмаларни ривожлантириш, буларда матбуотнинг ўрни каби масалалар давра суҳбатининг кун тартибидан ўрин олди.
Шунингдек, ахборот коммуникация технологиялари имкониятларидан фойдаланган ҳолда абитуриентларнинг ОТМларга кириш имтиҳонларига муносиб тайёргарлик кўришларига имкон яратиш, бу йўналишдаги истиқболли лойиҳалар ҳақида ҳам фикр юритилди.
Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)