Табиий офатларга қарши туриш ва зарар ҳажмини минималлаштириш мақсадида Ўзбекистон ва Жаҳон банки қўшма лойиҳани амалга оширишни бошлади. «Экономическое обозрение» журналида Жаҳон банкининг Европа ва Марказий Осиё минтақаси бўйича табиий офатлар рискини бошқариш бўйича мутахассиси, Ўзбекистонда табиий офатларга қарши кураш салоҳиятини мустаҳкамлаш дастури раҳбари Ко Такеучи билан уюштирилган интервью чоп этилди.
Унинг айтишича, табиий офатлар олдини тўлиқ олиб бўлмайди, аммо фавқулодда ҳолатларга тайёр туриш ва оқилона молиявий ҳимоя уларнинг оқибатларини бартараф этиш самарадорлигини сезиларли тарзда ошириши мумкин.
Мутахассис Ўзбекистонда аҳоли ва ҳудудларни фавқулодда ҳолатлардан ҳимоя қилиш бўйича яратилган норматив-ҳуқуқий асос ҳақида гапираркан, «Аҳоли ва ҳудудларни табиий ва техноген хусусиятга эга фавқулодда вазиятлардан ҳимоя қилиш тўғрисида», «Фуқаролар ҳимояси тўғрисида», «Қутқарув хизмати ва қутқарувчининг мақоми тўғрисида»ги қонунларни ва бошқа кўплаб ҳужжатларни тилга олди.
«Риск ҳақидаги маълумот — рискни камайтириш негизи», — деди Такеучи. Шунингдек, у табиий офатлар чоғида ҳаётий муҳим инфратузилманинг бардошлилигини таъминлаш учун архитектура ва қурилиш жараёнларини ўзгартириш зарурлигини таъкидлади.
Жаҳон банки вакили фавқулодда вазиятлар келиб чиққан тақдирда давлат органлари самарали ишлашини таъминлаш учун муассасалар ўртасидаги координацияни мустаҳкамлаш ва зудлик билан реакция кўрсатиш самарадорлигини ошириш зарурлигини қайд этди.
Изоҳ (0)