Tabiiy ofatlarga qarshi turish va zarar hajmini minimallashtirish maqsadida O‘zbekiston va Jahon banki qo‘shma loyihani amalga oshirishni boshladi. “Ekonomicheskoye obozreniye” jurnalida Jahon bankining Yevropa va Markaziy Osiyo mintaqasi bo‘yicha tabiiy ofatlar riskini boshqarish bo‘yicha mutaxassisi, O‘zbekistonda tabiiy ofatlarga qarshi kurash salohiyatini mustahkamlash dasturi rahbari Ko Takeuchi bilan uyushtirilgan intervyu chop etildi.
Uning aytishicha, tabiiy ofatlar oldini to‘liq olib bo‘lmaydi, ammo favqulodda holatlarga tayyor turish va oqilona moliyaviy himoya ularning oqibatlarini bartaraf etish samaradorligini sezilarli tarzda oshirishi mumkin.
Mutaxassis O‘zbekistonda aholi va hududlarni favqulodda holatlardan himoya qilish bo‘yicha yaratilgan normativ-huquqiy asos haqida gapirarkan, “Aholi va hududlarni tabiiy va texnogen xususiyatga ega favqulodda vaziyatlardan himoya qilish to‘g‘risida”, “Fuqarolar himoyasi to‘g‘risida”, “Qutqaruv xizmati va qutqaruvchining maqomi to‘g‘risida”gi qonunlarni va boshqa ko‘plab hujjatlarni tilga oldi.
“Risk haqidagi ma’lumot — riskni kamaytirish negizi”, — dedi Takeuchi. Shuningdek, u tabiiy ofatlar chog‘ida hayotiy muhim infratuzilmaning bardoshliligini ta’minlash uchun arxitektura va qurilish jarayonlarini o‘zgartirish zarurligini ta’kidladi.
Jahon banki vakili favqulodda vaziyatlar kelib chiqqan taqdirda davlat organlari samarali ishlashini ta’minlash uchun muassasalar o‘rtasidagi koordinatsiyani mustahkamlash va zudlik bilan reaksiya ko‘rsatish samaradorligini oshirish zarurligini qayd etdi.
Izoh (0)