Бугун, 10 февраль куни Қирғизистон Республикаси Ўш шаҳрида жойлашган Заҳириддин Муҳаммад Бобур номидаги давлат академик ўзбек мусиқали драма театрининг ижодий жамоаси Андижон вилоятининг «Дўстлик» чегара постида ўзбекистонлик санъат ва маданият намоёндалари томонидан кутиб олинди. Бу ҳақда Ўзбекистон Республикаси Маданият ва спорт ишлари вазирлиги матбуот хизмати хабар бермоқда.
Ўзбекистон Республикаси ва Қирғизистон Республикасининг чегара олди ҳудудлари ўртасидаги икки томонлама алоқаларни янада кенгайтириш, аҳоли, айниқса ёшларни Қирғизистон театр санъатининг намуналаридан баҳраманд этиш ҳамда ижодий ҳамкорликни кенгайтириш мақсадида ташкил этилган ижодий ташриф 17 февралгача давом этади.
Ижодий сафар давомида Бобур номидаги ўзбек мусиқали драма театрининг «Айкол Манас» спектакли жорий йилнинг 10—12 февраль кунлари Андижон вилояти мусиқали драма театрида, 13—14 февраль кунлари Наманган вилояти мусиқали драма театрида ҳамда 15—17 февраль кунлари Фарғона вилояти театр-концерт саройида ўтказилади.
Гастрол сафари давомида театрларда қирғиз ҳамда ўзбек санъати намоёндалари ўртасида ижодий учрашув ва давра суҳбатлари ташкил этилади.
Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)