Нью-Йоркдаги замонавий санъат музейи, АҚШ президенти Дональд Трампнинг миграция ҳақидаги фармонига норозилик рамзи сифатида, доимий намойишда турган Пабло Пикассо, Анри Матисс ва бошқа Ғарб рассомларининг суратларини эронлик санъат усталарининг ишлари билан алмаштирди. Бу ҳақда The New York Times хабар бермоқда.
Газетанинг ёзишича, намойишга қўйилган қарийб барча санъат асарлари «туғилганидан бери ёки келиб чиқиши» эронлик бўлганлар томонидан тайёрланган. Масалан, энди музей залларида видеорассом аёл Тола Маданий, ҳайкалтарош Парвиз Танаволий, фотосуратчи Шерон Шаҳбозийнинг ишларини кўриш мумкин.
Бундан ташқари, суданлик рассом Иброҳим ал-Солиҳий ва келиб чиқиши ироқлик бўлган британиялик меъмор — Заҳи Хадиднинг ижодий ишлари ҳам кўргазмага қўйилган.
Ҳар бир экспонатга изоҳловчи матн илова қилинган. Унда, хусусан, меҳмондўстлик ва эркинлик ғоялари нафақат бутун АҚШ учун, балки музей учун ҳам муҳим аҳамият касб этиши ҳақида сўз боради.
Эслатиб ўтамиз, Трампнинг миграция тўғрисидаги фармонига мувофиқ, аҳолиси асосан мусулмонлардан иборат етти мамлакат — Эрон, Ироқ, Судан, Ливия, Сомали, Яман ва Сурия фуқароларининг АҚШга кириши вақтинча чекланган эди.
Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)