Футболчи Анзур Исмоиловнинг марокашлик аёли, уларнинг муҳаббат тарихи ва Ўзбекистоннинг иккинчи ватанга айланиши ҳақида

Футболчининг аёли бўлиш осонми? «Sports.uz» журналисти Земфира Яблокова Хитойнинг «Чанчун Ятай» футбол клубида тўп сураётган Ўзбекистон миллий терма жамоаси аъзоси Анзур Исмоиловнинг рафиқаси билан яқиндан танишиб, бу саволга жавоб топишга уриниб кўрди.

«Исмим Соукаина. Марокашда туғилганман. Анзур билан танишгунимга қадар Хитойнинг Hainan Airlines авиакомпаниясида стюардесса бўлиб ишлардим», — деб гап бошлаган Исмоиловнинг аёли. Самимий суҳбатнинг қолган қисмини бахтли аёлнинг тилидан ўқишингиз мумкин.

Тақдир

Бу 2011 йилги воқеа. Ўшанда Чанчундан Пекинга учган рейсда хизмат қилгандим. Анзур эса йўловчилар орасида эди. Кутилмаганда у мулойим оҳангда телефон рақамимни сўради. Табиийки, илтимосини рад этдим. Дуч келган одамга телефон рақамимни бериб кетавермайман-ку, тўғрими?!

Орадан икки ой ўтиб, самолётда яна учрашиб қолдик. Анзур бу гал жамоаси билан сафарга йўл олаётган экан. У яна ўша илтимосини такрорлади, мен эса қайта рад жавобини бердим. Шунда Анзур агар унинг хоҳишини бажармасам, самолётни бошига кўтариб бақиришини айтди. Важоҳатидан сўнг рақамларни айтишдан бошқа чорам қолмади. Ўша куни кечга яқин менга қўнғироқ қилди ва шу тариқа ўртамизда муҳаббат тарихи бошланди.

2013 йилнинг 23 ноябрида никоҳдан ўтдик. Тўй Тошкентда бўлди. Бунгача эса ватаним Марокашда, оила даврасида ҳам кичик базм уюштиргандик.

Тўғрисини айтсам, футболчи билан турмуш қуриш тушимга ҳам кирмаганди (кулади).

Соукаина, Анзур Исмоиловнинг аёли

Футбол

Биринчи учрашувда Анзур мен учун одатий бир йўловчи эди. Кейинги сафар қаршимда футболчи турганини сездим. Чунки у жамоаси билан бирга эди.

Оиламизда ҳамма футбол ўйинини яхши кўрарди. Ёдимда, ёшлигимда муҳим ўйинларни оила даврасида берилиб томоша қилардик.

Соукаина, Анзур Исмоиловнинг аёли

Ҳижрон

Бу айни ҳақиқат. Кўпчилик футболчининг рафиқаси бўлиш жуда ажойиб деб ўйлайди. Аммо аслида бундай эмас. Баъзида жуда алам қилади одамга. Масалан, оиламизда бирор тантана нишонланса ёки фарзандларимиз туғилган кунида Анзур биз билан бирга бўлолмайди. Ўзимнинг туғилган кунимни-ку, айтмай қўя қолай (жилмаяди).

Ишонасизми, ҳаттоки, қизимиз дунёга келган пайт ҳам у ёнимда бўлмаган. Анзур биринчи марта қизалоғимизни қўлига олганида у 4 ойлик чақалоқ эди. Шуни инобатга олиб айтиш мумкинки, ҳаётимиз унча ҳавас қиларли эмас. Аммо шахсан мен сира нолимайман. Муҳаббат доим қурбонликлар талаб этади.

Соукаина, Анзур Исмоиловнинг аёли

Дугоналар

Менда «футболчи-дугоналар» талайгина. Уларнинг бари жуда чиройли, латофатли ва меҳмондўст. Мисол учун Яна Бикмаева (Марат Бикмаевнинг аёли) ва Карина Клецкова (Александр Клецковнинг аёли) билан қалин дугонамиз. Шунингдек, Замира Аҳмедова (Одил Аҳмедовнинг аёли) билан тез-тез кўришиб, суҳбатлашиб турамиз.

Дугоналар вақти-вақти билан тўпланиб, қайсидир тантанани нишонлашимиз, футбол учрашувларига боришимиз ёки таътил чоғи бирга ҳордиқ чиқаришимиз мумкин. Баъзида эса ўзимиз кечки овқат пайти йиғиламиз ва бир пиёла чой устида осон бўлмаган ҳаётимиз ҳақида ҳазиллашиб, кулишиб ўтирамиз.

Соукаина, Анзур Исмоиловнинг аёли

Фарзандлар

Икки фарзандимиз бор: ўғил ва қиз. Ўғилчамиз 4 ёшга тўлди, қизимиз эса 2 яшар.

Мен учун уларнинг қайси касбни танлаши муҳим эмас, асосийси — келажакда яхши инсон бўлиб етишиши. Турмуш ўртоғим, шубҳасиз, ўғлимиз унинг изидан боришини орзу қилади. Бироқ ҳаммаси вақт ҳукмига ҳавола. Борди-ю у бошқа соҳани танласа, бунга ҳеч ким қаршилик қилмайди.

Иложи топилса, фарзандларим билан стадионда борамиз. Борди-ю, бунинг имкони бўлмаса, телевизор орқали томоша қилиш билан чекланаман. Умуман Анзурнинг ўйинларини ўтказиб юбормасликка ҳаракат қиламан. Негаки бизнинг қўллаб-қувватлашимиз унга майдонда қўшимча дадиллик, ишонч бағишлашини биламан.

Соукаина, Анзур Исмоиловнинг аёли

Мухлисалар

Бу борада ҳеч қандай муаммо йўқ. Негаки улар аслида Анзурнинг эмас, футбол мухлисалари. Балки ишонмаслигингиз мумкин, лекин мен кўплаб мухлисалар билан яқиндан танишман. Ўйинлар вақти жамоамизни биргаликда қўллаб-қувватлаймиз. Хуллас, мазкур масалада хавотирга ўрин йўқ: ҳаммаси қатъий назоратим остида (кулади).

Соукаина, Анзур Исмоиловнинг аёли

Мулоқот

Биз аввалига инглиз тилида мулоқот қилардик. Бундан икки йил муқаддам русчада бирорта сўз айтолмасдим. Лекин дўстларим ёрдами билан бу тилни тезда ўзлаштириб олдим. Яъни, уларнинг ҳол-жонига қўймай, тинмай савол беравердим. Улар эса сўзларни қўшиш, тўғри талаффуз қилишни ўргатишаверди. Мана натижаси — ҳозир русчада бинойидек гапираман, ёзаман.

Мақтанишга йўйманг-у, аммо ўзи менда тил ўрганишга алоҳида иқтидор мавжуддек. Русчадан ташқари араб, француз, инглиз, хитой ва испан тилларида бемалол мулоқот қилишим мумкин.

Хобби бор. Мен арабча рақслар шайдосиман. Ўйлашимча, ҳар қандай шарқ аёли арабча рақсни қойиллатиши лозим.

Соукаина, Анзур Исмоиловнинг аёли

Ўзбекистон

О, ёққанда, қандоқ?! Ўзбекистон — айни кўнглимдаги маскан. Айниқса одамларнинг оқкўнгил ва меҳмондўстлигига таъриф йўқ. Улар исталган лаҳзада кўмакка тайёр.

Ўзбек халқининг инсоний фазилатларидан шунчаки лол қолдим. Яна ўзбек миллий таомларини ҳам дарров ёқтириб қолдим. Мисол учун қозон-кабоб ва мантига иштаҳам баланд. Палов эса табиийки, жону-дилим.

Менталитет томонидан олиб қарасак, бу ердаги урф-одатлар ўз юртимдагига жуда ўхшаш ва уларга мослашиш қийин кечмади. Шу боис бўлса керак, Ўзбекистонга нисбатан тезда алоҳида муҳаббат сездим. Ҳозир бемалол айтишим мумкин — Ўзбекистон иккинчи ватаним.

Илгари фақат Марокаш термаси тарафкаши эдим. Энди табиийки, Ўзбекистон миллий жамоасига ҳам алоҳида қайғураман. Умид қиламанки, термамиз ЖЧ—2018 да албатта иштирок этади. Бунинг учун имконият етарли. Ўзбек футболи орзусини рўёбга чиқариш йўлида турмуш ўртоғим ва унинг шерикларига омад ёр бўлишини тилайман.

Соукаина, Анзур Исмоиловнинг аёли