Тошкентда «Қуёшли замин: Исроилдан Ўзбекистонга» деб номланган кўргазма очилди

Ўзбекистон давлат санъат музейида «Қуёшли замин: Исроилдан Ўзбекистонга» деб номланган кўргазма очилди. Бу ҳақда ЎзА хабар бермоқда.

Исроиллик ижодкорлар «Шарқ тароналари» халқаро мусиқа фестивалида, тасвирий санъат ҳафталиклари, биенналеларда мунтазам иштирок этиб келмоқда. Ўзбекистон рассом ва ҳайкалтарошлари, халқ амалий санъати усталари, фотомусаввирларнинг ижод намуналари Исроилда ўтказиладиган кўргазмаларда муваффақият қозонмоқда.

Кўргазмадан Исроил рассомлар уюшмаси аъзолари Александр Постел, Иосиф Капелян, Герман Непомняший, Григорий Фирер, Андриан Жудренинг ўттиздан зиёд асари ўрин олган. «Қуддус», «Довуд минораси», «Ал-Ақсо масжиди» каби асарлар Исроил тарихи, маданий қадриятлари, хушманзара табиати ҳақида ҳикоя қилади.

Санъат халқлар ўртасидаги бирдамликни, маданий алоқаларни ривожлантиришнинг асосий омилидир. Бугунги кунда Ўзбекистон билан Исроил ўртасидаги ўзаро ҳамкорлик кўплаб йўналишларда, жумладан, маданият соҳасида ҳам изчил ривожланиб бораётгани бизни ғоят қувонтиради. Кўргазмада намойиш этилган Исроил рассомлари асарлари Ўзбекистон давлат санъат музейига совға сифатида топширилади.

Кармела Шамир, Исроилнинг Ўзбекистондаги фавқулодда ва мухтор элчиси

Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.