Ўзбекистон халқ артисти Муқаддас Холиқованинг аҳволи оғирлашгани маълум қилинди

22 январь куни юрак хуружини бошдан ўтказиб, Тошкентдаги 1-сонли марказий клиник шифохонага жойлаштирилган Ўзбекистон халқ артисти Муқаддас Холиқованинг аҳволи оғирлашган. Бу ҳақда «Qalampir.uz» хабар берди.

Хабар беришларича, шифохонанинг жонлантириш бўлимида даволанаётган актрисанинг аҳволи ҳақида унинг қизи Зебинисо ижтимоий тармоқлардаги саҳифаси орқали маълумот берган.

Онажоним 22 январь куни иккинчи бор инфаркт бўлиб, Тошкентдаги 1-сонли марказий клиник шифохонага ётқизилди, айни дамда жонлантириш бўлимида. Шифокорлар борки, бирор дардга чалинсак, улардан малҳам топамиз. Бироқ ҳамма шифокорлар ҳам вазифасига сидқидилдан ёндашмас экан.

Зебинисо, актриса Муқаддас Холиқованинг қизи

Зебинисо онасининг саломатлиги ҳақидаги саволларга жавоб берар экан, шифохоналарда ҳамон ишига масъулиятсиз шифокор ва ҳамширалар борлигини ёзиб ўтди.

Шифохонада даволанаётган онажонимнинг аҳволлари бугун оғирлашди. Ўзлари айтиб беришларича, кеча тунда ҳамширалар уларга осма укол қўйиб, чиқиб кетган. Орадан вақт ўтиб, игна томирларидан чиқиб кетиб, қон оқа бошлаган. Бунинг оқибатида қон босимлари тушиб кетган. Тунги соат 4:00 да хабар олишга кирган ҳамширалар ерга оқиб ётган қонни кўрган ва уни артиб олган. Буларни менга онам айтиб берди. Лекин ҳамширалар ва шифохонадагилар бу ҳолатни буткул рад этяпти.

Зебинисо, актриса Муқаддас Холиқованинг қизи

Муқаддас Холиқованинг қизи ўз хабари сўнгида маълум қилишича, айни дамда актрисани бошқа шифохонага олиб ўтишга ҳаракат қилинмоқда. У вазиятдан бохабар бўлиб, телефон орқали хабар олиб турганларга миннатдорчилик билдирган.

Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.