Суриянинг Ракка шаҳрини ИШИД ташкилотидан озод қилиш бўйича режадан воз кечиш учун Дональд Трампнинг маслаҳатчиларига «биргина назар» кифоя бўлди. Бу ҳақда The Washington Post маълум қилди, деб ёзади «Интерфакс».
Аввалги маъмурият маслаҳатчилари етти ой давомида зўр бериб ишлаб чиққан режа Обама президент лавозимидан кетиши олдидан янги маъмуриятга топширилган эди. Аммо ушбу ҳужжатга риоя қилиш ўрнига, Трампнинг миллий хавфсизлик бўйича жамоаси уни бутунлай бефойда деб топиб, шу заҳоти четга суриб қўйди.
Янги жамоа фикрича, Обаманинг режаси рискли ва «муваффақиятсизликка учраши аниқ» бўлган, чунки унда Суриядаги вазиятнинг муҳим жиҳатлари ҳисобга олинмаган.
Трампнинг расмий вакиллари айтишича, режада Ракка бўйича Россия билан ҳаракатлар координацияси тилга олинмаган, шунингдек, курд исёнчилари операциясида қатнашишдан қатъиян бош тортадиган Туркияга нисбатан «тинчлантирувчи» чоралар ҳам мавжуд эмас.
Президент ва унинг етакчи маслаҳатчилари ИШИД ўз пойтахти деб эълон қилган Раккани озод этиш масалаларида Россия билан, ҳатто, Сурия президенти Башар Асад билан янада яқинроқ ҳаракатлар координацияси ҳақида қарор қабул қилиши мумкин, дейилади мақолада.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
Изоҳ (0)