Таиланд бош вазири ўринбосарини ўлдириш билан таҳдид қилишмоқда

Таиланд бош вазири ўринбосари ва мудофаа вазири Правит Вонгсуванни ўлдириш билан таҳдид қилишди, деб ёзади «ТАСС».

Қироллик қуруқликдаги қўшинлари бош қўмондони Чалермчай Ситтхисат фикрича, таҳдидлар ортида фитна турган бўлиши, унинг иштирокчилари бош вазир ўринбосарини йўқ қилиш вазифасини ўз олдига қўйган бўлиши мумкин. У, шунингдек, бундай таҳдидлар ижтимоий матбуот орқали бош вазир Прают Чан-Очага ҳам келиб тушаётганини тасдиқлади.

Ушбу маълумотни текшириш билан махсус хизматлар шуғулланмоқда, ҳукумат хавфсизлик хизмати эса қўриқлаш тизимини кучайтирди. «Бундай нарса содир бўлмаслигига аминман. Таҳдид қилаётганлар жазосини олади», — деди генерал.

Аввалроқ The Washington Post газетаси Таиландни 2017 йилда, нашр фикрича, армия иштирокида фитна содир этилиши эҳтимоли бўлган мамлакатлар рўйхатида иккинчи ўринга жойлаштиргач, бош вазир ўринбосари  мамлакатда ҳарбий тўнтариш юз бериши эҳтимолини рад этган эди.