Ўзбекистон Биринчи Президенти Ислом Каримов таваллуд санаси муносабати билан мамлакат бўйлаб турли тадбирлар бўлиб ўтмоқда. Бу ҳақда ЎзА хабар бермоқда.
Ўзбекистон Президенти Шавкат Мирзиёев 25 январь куни «Ўзбекистон Республикасининг Биринчи Президенти Ислом Абдуғаниевич Каримовнинг хотирасини абадийлаштириш тўғрисида»ги қарорни имзолаган эди.
Мирзо Улуғбек номидаги Ўзбекистон Миллий университетида Ислом Каримов таваллуд топган кун муносабати билан ўтказилган тадбирда университет ректори А.Мараҳимов, академик М.Салоҳиддинов, адабиёцҳунос Ш.Ризаев ва бошқалар халқнинг тинч ва фаровон ҳаёти, мамлакатнинг барқарор иқтисодий равнақи учун борлиғини, умрини бағишлаган, жаҳон миқёсида катта обрў-эътибор қозонган буюк давлат ва сиёсат арбоби Ислом Каримовнинг беқиёс хизматларини ёшлар онгу қалбига сингдириш катта тарбиявий аҳамиятга эга эканини таъкидлади.
Ислом Каримов номидаги Тошкент давлат техника университетида ташкил этилган тадбирда олий ва ўрта махсус таълим вазири ўринбосари М.Каримов, университет ректори Ф.Ризаев, Ўзбекистон Ёзувчилар уюшмаси раиси М.Аҳмедов, Олмазор тумани ҳокими Б.Ғойибназаров ва бошқалар Ислом Каримов ўзининг серқирра сиёсий фаолияти, олижаноб инсоний фазилатлари билан Ўзбекистоннинг кўп асрлик тарихида ёрқин из қолдирганини таъкидлади.
Ўзбекистон Республикаси Ички ишлар вазирлиги маданият саройида «Ислом Каримов – Ўзбекистон Республикаси мустақиллигининг асосчиси» номли маънавий-маърифий тадбирда Ислом Каримовнинг давлат ва сиёсат арбоби сифатидаги кенг қамровли фаолияти яна бир бор эътироф этилди.
Ўзбекистон Ёзувчилар уюшмаси раисининг биринчи ўринбосари С.Саййид, Ўзбекистонда хизмат кўрсатган журналист Қ.Каримбеков ва бошқалар Президент Шавкат Мирзиёев бошчилигида Ислом Каримов хотирасининг абадийлаштирилаётгани бутун Ўзбекистон халқининг дилидаги эзгу истак эканини таъкидлади.
Алишер Навоий номидаги Ўзбекистон Миллий кутубхонасида «Мустақиллигимиз фидойиси» мавзуида давра суҳбати бўлиб ўтди. Тадбирда истиқлол йилларида Ўзбекистондаги тинчлик ва барқарорлик, меҳр-оқибат ва бағрикенглик, миллатлараро тотувликни асраб-авайлаш, мустақилликни мустаҳкамлашдек буюк ишлар Ислом Каримов номи билан чамбарчас боғлиқ экани таъкидланди.
Тадбиркорлар ва ишбилармонлар ҳаракати – Ўзбекистон Либерал-демократик партияси сиёсий кенгаши ижроия қўмитаси, партиянинг Олий Мажлис Қонунчилик палатасидаги фракцияси ва Тошкент шаҳридаги Турин политехника университети ҳамкорлигида ўтказилган тадбирда Биринчи Президент ташаббуси билан ёшлар ҳуқуқ ва манфаатларини таъминлашнинг ҳуқуқий, ташкилий асослари яратилгани, уларнинг истеъдодини рағбатлантириш ва қўллаб-қувватлашнинг мустаҳкам механизми шакллантирилгани ҳақида ёшларга сўзлаб берилди.
Тошкент кимё-технология институтида Ўзбекистон Халқ демократик партияси Тошкент шаҳар кенгаши томонидан ташкил этилган тадбир «Келажаги буюк юртнинг Биринчи Президенти – Сиз доимо қалбимиздасиз!» деб номланди.
Институт ректори С.Туробжонов, Ўзбекистон Халқ демократик партияси Тошкент шаҳар кенгаши раиси ўринбосари Н.Йўлдошева ва бошқалар Ўзбекистон Биринчи Президенти ёш авлодга мунтазам ғамхўрлик кўрсатганини таъкидлади.
Қибрай туманидаги «Дўрмон» маданият саройида ўтказилган маданий-маърифий тадбирда ёшларга Ўзбекистон Биринчи Президенти раҳнамолигида шаҳару қишлоқларда рўй берган оламшумул ўзгаришлар, фуқаролар кайфияти, бугунги ҳаётдан мамнунлиги ҳамда мустақилликкача бўлган даврдаги оғир кунлар ҳақида сўзлаб берилди.
Фарғона давлат университетида Ислом Каримовнинг ҳаёти ва фаолияти, бой маънавий меросига бағишлаб ўтказилган илмий анжуманда Биринчи Президент билан боғлиқ Ўзбекистоннинг истиқлол йилларида эришган улкан ютуқ ва натижалари, барча соҳаларда олиб борилган ислоҳотлар самаралари ҳақида сўз борди. У кишининг фидойилик, ватанпарварлик, адолатпарварлик, самимийлик, меҳрибонлик каби олижаноб фазилатлари барча учун ёрқин ибрат намунаси экани таъкидланди.
Андижон банк коллежида Ўзбекистон Халқ демократик партияси вилоят кенгаши ҳамда вилоят ўрта махсус, касб-ҳунар таълими бошқармаси ҳамкорлигида ўтказилган тадбир «Буюк Йўлбошчига ҳамиша таъзимдамиз» деб номланди.
Ўзбекистон Биринчи Президенти Ислом Каримов таваллуди санаси – 30 январь куни муносабати билан бутун мамлакат бўйлаб турли тадбирлар давом этмоқда.
Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)