Хоразм вилоятининг Гурлан туманида яшовчи Мунаввара Давлатова (исм-шарифлар ўзгартирилган) бир неча йил муқаддам ўзини «табиб», деб эълон қилди. Унинг табиблигига бировлар ишонди, бировлар бунга қўл силтаб қўя қолди, деб ёзади «Инсон ва қонун» нашри.
Кунларнинг бирида «табиб» опа ҳузурига М.Раҳимова келиб, қизи Малика Рўзиматовани дарддан фориғ этиб беришни сўрайди. Давлатова таклифни бажонидил қабул қилиб, Маликани уйида «даволаш»га киришади. «Табиб» бу жараёнда ўз мижозини обдан ўрганади. Қараса, Маликадан туппа-тузук шерик чиқиши ҳам мумкин. Давлатова буни фаҳмлаб, анчадан буён дилига тугиб юрган фирибгарлик мақсадларини амалга оширишга киришади.
Уларнинг тузоғига даставвал Урганч туманидаги «Асалчилик» маҳалласида яшовчи Ражаббой Бобожонов тушади. Унинг ўғли гиёҳвандлик воситалари билан боғлиқ жиноят содир этиб, озодликдан маҳрум қилинганди. Икковлон фирибгарлик йўли билан Р.Бобожоновнинг ишончини суиистеъмол қилишга киришади ва ўғлини 800 АҚШ доллари ҳамда 400 минг сўм пул эвазига қамоқдан озод қилишга ваъда беради. Ражаббой ака фирибгарларнинг сўзига лаққа тушиб, айтилган пулни уларга дарҳол қўшқўллаб тутқазади.
Гурланлик Р.Отажонов тўнғич фарзанди автоҳалокат натижасида вафот этганлиги боис қаттиқ изтиробга тушиб, оғир дардга йўлиқади ва нажот излаб, Мунаввара «табиб»нинг уйига боради. Давлатова мўмайгина даромаднинг «ҳиди»ни сезиб, Малика деган «адвокат» таниши борлиги, ундан зарур ёрдам олиш мумкинлигини айтади. Маликанинг нималарга қодирлигини баён қила туриб, балки сизнинг ўғлингиз тирикдир, автоҳалокатда бошқа киши ўлгандир, дея ишонтиришга уринади.
Оғир руҳий ҳолатдаги бемор Ражаббой ака бундай аврашга лаққа ишонади. Иш силлиққина битаётганидан руҳланган Мунаввара эса фурсатни ўтказмай Маликага телефон қилиб, тезда етиб келишини тайинлайди. Малика Ражаббой акага Урганч шаҳрида адвокат бўлиб ишлашини, барча ҳуқуқни муҳофаза қилувчи идораларда танишлари борлигини, улар кўмагида ўғлини топиб бера олишини айтади.
Шундан сўнг «адвокат» аёл тезда ишга киришиб, Ражаббой акани «ўғлингиз тирик, у қамоқда сақланаяпти», дея аврайди. Фарзандининг тириклигига астойдил ишонган одам улардан пулни ҳам, мол-мулкни ҳам аямайди. 2014 йил февралидан 24 августига қадар айни кунларда гўёки қамоқда сақланаётган ўғлини озод қилиш учун фирибгарларга 31 500 АҚШ доллари ҳамда 4,1 миллион сўмлик озиқ-овқат ва кийим-кечакларни инъом қилиб юборади.
Судда М.Рўзиматова ҳамда М.Давлатоваларнинг айби тўла тасдиқланди. Муқаддам жиноят содир этиб, амнистия акти туфайли муқаррар жазодан қутулиб қолган М.Рўзиматова бу гал жавобгарликка тортилди ва 11 йил муддатга озодликдан маҳрум қилинди. М.Давлатова ҳам тегишли жазога тортилди.
Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)