Банк соҳасида ахборот технологияларининг қўлланилиши кучайиб боргани сари, маблағларни олишнинг янгидан-янги шакллари пайдо бўлмоқда. Улар орасида бир пластик картадан иккинчисига пул ўтказиш ҳам бор. Шу муносабат билан савол туғилади: бундай йўл билан маблағ олиниши солиқ органлари нуқтаи назаридан қандай кўриб чиқилади? Улар солиқ солинадиган пул маблағлари ҳисобланадими? Мутахассис Камила Каримова ушбу саволларга ўзининг «Пул ўтказмаси даромад ҳисобланадими?» сарлавҳали мақоласида жавоб беришга ҳаракат қилди.
Давлат солиқ қўмитаси сайтига Тошкент шаҳар Давлар солиқ бошқармаси томонидан жойланган изоҳда Ўзбекистонда алоҳида шахслар томонидан олинган барча пул ўтказмалари солиқлардан озод бўлган, аммо декларация қилиниши керак бўлган даромадлар ҳисобланиши айтилади.
Қабул қилинган пул ўтказмаларининг суммаси ҳақида жисмоний шахс — пул ўтказмасини қабул қилиб олувчи мустақил тарзда декралация қилиши керак. Банк ўтказмалар суммасини тўлашда солиқ агенти ҳисобланмайди, яъни банк тўланган ўтказма суммасидан солиқ ушлаб қолмайди ва ўтказмани тўлиқ ҳажмда тўлайди.
Ўзбекистон Республикаси солиқ қонунчилигига мувофиқ, жисмоний шахслардан бепул олинган мулклар ёки мулк ҳуқуқлари қиймати бошқа даромадлар ҳисобланади ва умумий даромад таркибига киритилади. Умумий даромад эса даромад солиғи бўйича солиқ солинадиган объектдир.
Аммо Солиқ кодексининг 179-моддасига кўра, жисмоний шахслардан мерос ва ҳадя тартибида, шунингдек, бепул олинган пул ва маҳсулот шаклидаги даромадларга имтиёзлар кўзда тутилган, яъни уларга даромад солиғи солинмайди. «Бепул» таърифига бир жисмоний шахс пластик картасидан иккинчисиникига ўтказмаларнинг кўпчилик қисми тўғри келади.
Алоҳида шахс солиқ органларига пластик карта ҳисобига ёки банк ҳисобига келиб тушган маблағларнинг келиб чиқиши ҳақида тушунтириш бериши шарт эмас. Шу билан бирга, олинган маълумот, ҳужжатлар, маълумотномалар асосида солиқ хизмати ходимлари судда солиқдан бош тортиш ҳолатини исботлай олса, улар суд қарори асосида тўланиши керак бўлган солиқ суммасини мустақил белгилаш, шунингдек, жарималар солиш ҳуқуқига эга бўлади.
Изоҳ (0)