Нафақат АҚШда, балки жаҳонда энг бадавлат ҳисобланган одамлар шу фикрда: АҚШ Трамп президентлигида ҳам ривожланаверади

АҚШ Дональд Трампнинг президентлиги даврида жамиятдаги ҳозирги бўлинишни енгиб ўтиб, ривожланишда давом эта олади. Бу ҳақда миллардерлар Билл Гейтс ва Уоррен Баффет Колумбия университетидаги чиқишлари чоғида айтиб ўтди, дея хабар беради «Коммерсант.ru».

Гейтснинг фикрича, АҚШ президенти маъмурияти ва Конгресс «ажойиб ташаббусларни бошлаяпти». Уоррен Баффетнинг ишонч билдиришича, «Америка олдинга интилишда давом этади».

Баффетнинг қўшимча қилишича, «замонавий сиёсатчиларни 20 йил олдинни ўйлаб ҳаракат қилишга мажбурлаш қийин», чунки уларнинг асосий вазифаси стратегик вазифаларни ҳал қилиш эмас, балки қайта сайланишдир.

Билл Гейтснинг қайд этишича, ҳозирги «маъмурият нисбатан ёш». «Уларнинг бюджет борасидаги мақсадлари ҳаётга қай даражада татбиқ этилишини биз ҳозирдан билмаймиз», — дея қўшимча қилди Microsoft асосчиси.

Маълумот учун, Трамп президент этиб сайланганидан кейин Уоррен Баффетнинг мол-мулки 11,1 миллиард долларга ошди. Билл Гейтс асос солган Microsoft компаниясининг капиталлашуви 17 йил мобайнида биринчи бор 500 миллиард доллардан ошди.

Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.