2016 йилнинг ноябрида NASA орбитага GOES сериясидаги янги метеойўлдошни чиқарган эди. Икки ой ўтиб, Ерга илк юқори сифатли фотосуратлар юборилди, деб ёзади National Geographic.
GOES сериясидаги сунъий йўлдошлар Ғарбий ярим шарда атмосфера ва юза ўлчамларини олиб бориш учун мўлжалланган бўлиб, уларнинг асбоблари аввалги авлод қурилмаларига нисбатан беш карра тезроқ ишлайди ва тўрт марта каттароқ ҳажмга эга суратларни олади.
Йўлдош январь ойида юборган маълумотларнинг биринчи пакети яқинда бўлиб ўтган кучли ёмғирлар таъсири остидаги АҚШнинг қитъа қисми, Африка қирғоқларидаги чанг бўрони, Кариб ҳавзасидаги саёзликлар суратларини ўз ичига олади.
GOES Ерга узатадиган ахборот шунчаки чиройли манзаралар бўлиб қолмай, у об-ҳавони прогноз қилиш, бўронларни кузатиш, космик об-ҳавони мониторинг қилиш ва метеорологик тадқиқотлар учун зарур.
Изоҳ (0)