2017 йилнинг 23—27 январь кунлари Тошкентдаги International Hotel Tashkent меҳмонхонасининг «Биллур» залида Ўзбекистон Республикаси Президенти Шавкат Мирзиёев ташаббуси билан ишлаб чиқилган «2017—2021 йилларда Ўзбекистон Республикасини ривожлантиришнинг бешта устувор йўналишлари бўйича ҳаракатлар стратегияси» лойиҳасининг жамоатчилик муҳокамасига бағишланган медиа-ҳафталик бўлиб ўтади. Бу ҳақда «Infocom.uz» хабар берди.
Медиа-ҳафталик дастуридан мазмунан икки қисмга бўлинадиган – Ҳаракат стратегиясининг бешта йўналиши тақдимотлари, улар юзасидан очиқ муҳокама ва мунозара тарзида бўлиб ўтадиган брифинг, матбуот анжуманлари, ток-шоулар ўрин олган. Тайёрланган барча медиа материаллар мамлакатнинг нодавлат телерадиостанциялари эфирлари орқали тезкорлик билан узатиб борилади, шунингдек, интернет ОАВ ҳамда ижтимоий тармоқларга жойлаштирилади.
Медиа-ҳафталик давомида тадбирлар иштирокчилари Ҳаракат стратегияси лойиҳаси аҳамияти ва мазмуни юзасидан фикр-мулоҳазалари билан ўртоқлашади, уни муҳокама қилади ва бу борада аҳолига тушунтиришлар беради ҳамда жамиятни ташвишлантираётган саволларга жавоблар қайтаради.
Медиа-ҳафталик фаолияти давомида ҳар куни Ҳаракат стратегияси лойиҳасининг қуйидаги йўналишлари бўйича тақдимотлар ўтказилади:
I. Душанба, 23 январь – «Давлат ва жамият қурилиши тизимини такомиллаштиришнинг устувор йўналишлари».
II. Сешанба, 24 январь – «Қонун устуворлигини таъминлаш ва суд-ҳуқуқ тизимини янада ислоҳ қилишнинг устувор йўналишлари».
III. Чоршанба, 25 январь – «Иқтисодиётни ривожлантириш ва либераллаштиришнинг устувор йўналишлари».
IV. Пайшанба, 26 январь – «Ижтимоий соҳани ривожлантиришнинг устувор йўналишлари».
V. Жума, 27 январь – «Хавфсизлик, диний бағрикенглик ва миллатлараро тотувликни таъминлаш ҳамда чуқур ўйланган, ўзаро манфаатли ва амалий ташқи сиёсат соҳасидаги устувор йўналишлар».
Изоҳ (0)