Шавкат Мирзиёев Венгрияга ҳамдардлик билдирди
Ўзбекистон Президенти Шавкат Мирзиёев, Италиянинг Верона вилоятида Венгрия фуқаролари бўлган автобус иштирокида юз берган йўл-транспорт ҳодисаси оқибатида кўплаб одамлар қурбон бўлгани муносабати билан, Венгрия президенти Янош Адерга ҳамдардлик билдирди. Бу ҳақда Ўзбекистон Ташқи ишлар вазирлиги матбуот хизмати хабар берди.
Ўзбекистон раҳбари ўз мактубида самимий таъзия изҳор этиб, қурбон бўлганлар ва жабрланганларнинг оила аъзолари ва яқинларига ҳамдардлик туйғуларини етказишни сўради.
«Газета.uz»нинг ёзишича, Италияда 21 январга ўтар кечаси Франциядан Венгрияга кетаётган сайёҳлик автобуси кўприкнинг устунига урилиб, ёниб кетди.
Йўловчилар орасида 14—18 ёш оралиғидаги ўқувчилар, ота-оналар ва ўқитувчилар — жами 55 киши бўлган. ОАВ ахборотига кўра, ҳодиса оқибатида 16 киши ҳалок бўлган.
Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.
