Трамп Обаманинг соғлиқни сақлаш ислоҳотини бекор қилиш ҳақидаги фармонни имзолади

Дональд Трамп ундан аввалги АҚШ президенти томонидан амалга оширилган соғлиқни сақлаш ислоҳотини бекор қилиш ҳақидаги фармонни имзолади. Бу ҳақда Meduza хабар бермоқда.

Фармон Трампнинг инаугурациясидан бир неча соат ўтиб имзоланган ва бу унинг президент лавозимидаги дастлабки қадамларидан бири бўлди.

Ҳужжат ҳукумат хизматларига Obamacare ҳақидаги қонун билан татбиқ этилган баъзи талабларни — хусусан, солиқ талаблари ва жарималарини эътиборсиз қолдириш мажбуриятини юклайди.

Айни вақтда, мазкур талабларнинг аксарияти конгресс томонидан қабул қилинган ва қонун мақомига эга, шу сабабли, The Washington Post’нинг ёзишича, президент фармони айнан қайси талабларга таъсир кўрсата олиши ҳозирча ноаниқ.

CNN’нинг ёзишича, Obamacare’ни бекор қилиш ҳақидаги фармонни имзолаш — рамзий маънога эга: янги президент маъмурияти соғлиқни сақлаш ислоҳотини бекор қилиш унинг асосий мақсадларидан бири эканини англатишни хоҳлаган.

Президентлигининг биринчи кунида мазкур фармонни имзолаш орқали, Трамп муҳим бир сигнал берди: 20 миллион америкалик учун соғлиқни сақлаш хизматлари сари йўл очган ислоҳотни бекор қилиш унинг асосий мақсадларидан биридир.

CNN

Дональд Трамп бу ислоҳотни муваффақиятсиз ва ўта қиммат деб атаб, уни нисбатан арзон ва самарали ислоҳот билан алмаштиришга ваъда берган. Бироқ у ўз сайлов кампанияси давомида унинг жамоаси дастлаб янги ислоҳотни тайёрлаб, сўнг Obamacare’ни бекор қилишини айтиб ўтган эди.

Obamacare’га ҳозирда Конгрессдаги республикачилар кўпчилиги ҳам қарши чиқмоқда. 2017 йил 11 январида АҚШ Сенати ислоҳотни бекор қилиш учун овоз берган.

Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.