Гамбиянинг амалдаги етакчиси Яҳё Жамме, Сенегал қўшинлари Гамбия ҳудудига кириб келганидан сўнг, ўз ўрнини мамлакатнинг янги сайланган президенти Адама Берроуга бўшатиб беришга рози бўлди. Бу ҳақда Берроу Twitter’даги саҳифасида маълум қилган.
Ғарбий Африка иттифоқи қўшинларининг Гамбияга интервенсияси 20 январь куни тушда вақтинча тўхтатилган эди. Бу Жамме лавозимни ўз хоҳишига кўра тарк этиши учун берилган вақт эди. Охир-оқибат, Жамме давлат раҳбари ўрнини бўшатиб, Гамбияни тарк этишга рози бўлган.
Жамме 1994 йилдан бери эгаллаб турган Гамбия президенти лавозимини тарк этишдан бош тортгач, мамлакатнинг янги сайланган президенти Адама Берроу 19 январь куни Сенегалда Гамбия президенти сифатида қасамёд қилган эди.
Шундан сўнг Сенегал қуролли кучлари Адама Берроуни ҳокимиятга қайтариш мақсадида Гамбия ҳудудига кирди. Бир неча соатдан сўнг БМТ Хавфсизлик кенгаши Берроуни Гамбия президенти сифатида тан олишини билдирувчи резолюцияни қабул қилди.
2016 йилнинг 1 декабрь куни Жамме Гамбия президенти сайловида мағлуб бўлган, бироқ кейинроқ лавозимини тарк этишдан бош тортган эди. 2017 йилнинг 17 январь куни Жамме Гамбия бўйлаб 90 кун амал қилувчи фавқулодда ҳолат тартибини эълон қилган эди.
Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)