Tramp Obamaning sog‘liqni saqlash islohotini bekor qilish haqidagi farmonni imzoladi

Donald Tramp undan avvalgi AQSh prezidenti tomonidan amalga oshirilgan sog‘liqni saqlash islohotini bekor qilish haqidagi farmonni imzoladi. Bu haqda Meduza xabar bermoqda.

Farmon Trampning inauguratsiyasidan bir necha soat o‘tib imzolangan va bu uning prezident lavozimidagi dastlabki qadamlaridan biri bo‘ldi.

Hujjat hukumat xizmatlariga Obamacare haqidagi qonun bilan tatbiq etilgan ba’zi talablarni — xususan, soliq talablari va jarimalarini e’tiborsiz qoldirish majburiyatini yuklaydi.

Ayni vaqtda, mazkur talablarning aksariyati kongress tomonidan qabul qilingan va qonun maqomiga ega, shu sababli, The Washington Post’ning yozishicha, prezident farmoni aynan qaysi talablarga ta’sir ko‘rsata olishi hozircha noaniq.

CNN’ning yozishicha, Obamacare’ni bekor qilish haqidagi farmonni imzolash — ramziy ma’noga ega: yangi prezident ma’muriyati sog‘liqni saqlash islohotini bekor qilish uning asosiy maqsadlaridan biri ekanini anglatishni xohlagan.

Prezidentligining birinchi kunida mazkur farmonni imzolash orqali, Tramp muhim bir signal berdi: 20 million amerikalik uchun sog‘liqni saqlash xizmatlari sari yo‘l ochgan islohotni bekor qilish uning asosiy maqsadlaridan biridir.

CNN

Donald Tramp bu islohotni muvaffaqiyatsiz va o‘ta qimmat deb atab, uni nisbatan arzon va samarali islohot bilan almashtirishga va’da bergan. Biroq u o‘z saylov kampaniyasi davomida uning jamoasi dastlab yangi islohotni tayyorlab, so‘ng Obamacare’ni bekor qilishini aytib o‘tgan edi.

Obamacare’ga hozirda Kongressdagi respublikachilar ko‘pchiligi ham qarshi chiqmoqda. 2017-yil 11-yanvarida AQSh Senati islohotni bekor qilish uchun ovoz bergan.

Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.