Ўзбекистон делегацияси 20 январь, жума куни бошланган «Яшил ҳафталик—2017» халқаро қишлоқ хўжалик кўргазмасида иштирок этиш учун Германиянинг Берлин шаҳрига йўл олди. Бу ҳақда «Ўзагроэкспорт» АЖ матбуот хизмати хабар бермоқда.
«Яшил ҳафталик» халқаро кўргазмаси озиқ-овқат саноати, боғдорчилик, қишлоқ ва ўрмон хўжалиги соҳасидаги йирик тадбирлардан бири ҳисобланади. Бу сафарги кўргазмада дунёнинг 65 мамлакатидан 1550 дан ортиқ компания ва фермер хўжаликлари иштирок этиши, 380 мингдан ортиқ киши ташриф буюриши кутилмоқда.
Маҳаллий экспортёр корхона ва ташкилотларнинг мазкур кўргазмада иштирок этишидан мақсад мева-сабзавот маҳсулотларини ўстириш, ишлаб чиқиш ва қайта ишлаш бўйича мавжуд салоҳиятини намойиш этиш ҳамда ушбу соҳадаги етакчи хорижий компаниялар билан мустаҳкам ҳамкорлик алоқаларини ўрнатишдан иборат.
Халқаро кўргазмадаги Ўзбекистон миллий экспозицияси «Ўзбекозиқовқатхолдинг», «Ўзвиносаноат-холдинг» ва «Ўзагроэкспорт» компаниялари томонидан намойиш қилинади. Стендларга «Агромир Групп», Natural Juice, Marwin Brands, Master Global Plus, Sunny Fruits Production, Berad Agro, Gold Dried Fruits, Intersok каби корхоналар маҳсулотлари — ҳўл ва қайта ишланган мева-сабзавот маҳсулотлари, консерваланган маҳсулотлар, сок ва нектарлар, қуритилган зиравор ва сабзавотлар, қуруқ мевалар ҳамда ширинликлар қўйилади.
«Яшил ҳафталик—2017» халқаро кўргазмаси 29 январга қадар давом этади.
Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)