Хитой футболини чўққига олиб чиқиш учун катта ҳажмдаги ишлар амалга оширилмоқда. «Дарё» Гуанжоудан 80 километр узоқликда қад ростлаган Evergrande International Football School академиясига тўхталиб ўтганди. Яқин орада Хитойда шу қатори яна бир нечта футбол академияларига асос солинади.
Савол туғилади, академиялардан етишиб чиқадиган футболчиларнинг кейинги тақдири қандай бўлади? Хитойликлар яна 10 йиллардан кейин юлдуз футболчилар учун миллион сарфлаш фикридан йироқ. Бугун уларнинг ёрдамида хитойлик болакайларнинг кўнгли футболга меҳр билан тўлдирилади, 10 йилдан кейин эса ўша болалар футбол академиялари ёрдамида моҳир футболчи бўлиб етишади.Уларнинг айримлари Хитой Супер лигасини чўққига кўтариш учун ҳаракат қилади. Яна-да салоҳиятлилари эса Европага юборилади. Бунда улар Европа жамоалари қачон хитойлик йигитларга кўз тикар экан деб кутиб ўтирмайди.
Мамлакатнинг йирик компаниялари ва бойлари ҳозирга қадар кўҳна қитъанинг 14 та клубини ўзи билан ҳисоблашишга мажбур эта олди. Бу клубларнинг саралари вақти келиб хитойлик футболчини захира ўриндиғи учун бўлса ҳам олади, ўртамиёна жамоаларда эса чин ўлкасидан етишиб чиққан иқтидорлар асосий таркибда тўп суради. Бу билан мамлакат футболида сифат ўсади.
«Championat.asia» нашри Хитой компаниялари бир неча фоиз акциясини сотиб олган Европа клублари номини келтириб ўтди:
«Атлетико» (Испания) — WandaGroup
«Эспаньол» (Испания) — RastarGroup
«Гранада» (Испания) — Link International Sports Limited
«Интер» (Италия) — Suning Commerce Group
«Милан» (Италия) — Europe Sports Investment Management Changxing
«Ницца» (Франция) — Хитой—АҚШ консорциуми
«Сошо» (Франция) — Ledus
«Лион» (Франция) — IDG Capital Partners
«Астон Вилла» (Англия) — Recon Group
«Вулверҳэмптон» (Англия) — Fosun
«Манчестер Сити» (Англия) — China Media Capital Holdings
«Вест Бромвич» (Англия) — Yunyi Guokai Sports Development Limited
«Ден Хааг» (Голландия) — United Vansen International Sport
«Славия» (Чехия) — China Energy Company Limited
Хитой миллиардерлари ва улар бошқараётган компаниялар шу билан чекланиб қолмоқчи эмас. Олдинда сиз-у бизни яна-да ҳайратланарли янгиликлар кутиб турган бўлса ажаб эмас.
Изоҳ (0)