Европа футбол уюшмалари иттифоқи (УЕФА) 2016 йилнинг рамзий терма жамоасини тузиб чиқди. Мухлисларнинг овоз бериш йўли орқали Европа чемпионатларида тўп сураётган энг яхши футболчилар аниқланди, деб хабар бермоқда «Sports.uz».
Рамзий терма жамоанинг учдан бир қисмини«Реал» футболчилари ташкил қилди: Серхио Рамос, Тони Кроос, Лука Модрич ва Криштиану Роналду. «Барселона»нинг эса 3 футболчиси – Жерар Пике, Луис Суарес ва Лионель Месси рамзий термага киритилди. Ла Лигада иштирок этаётган «Атлетико» жамоаси аъзоси Антуан Гризманн ҳам шулар қаторида. Шундай қилиб, Испания чемпионатидан бир йўла 8 футболчи рамзий термага киритилди.
Қайд этиш жоиз, «Реал» етакчиси Криштиану Роналду йилнинг рамзий терма жамоаси таркибига 11 марта киритилди. Лионель Месси эса 8 марта УЕФАнинг йил рамзий термасидан жой олмоқда.
Испания чемпионати вакилларидан ташқари УЕФА рамзий терма жамоасидан Италия А Серияси вакили — «Ювентус» клуби посбони Жанлуижи Буффон ва ҳимоячи Леонардо Бонуччи жой олди. «Бавария» ҳимоячиси Жером Боатенг рамзий термада ягона Бундеслига вакили бўлди.
Дунёнинг энг кучли чемпионатларидан саналга Англия Премьер-лигасидан ҳеч қайси футболчи УЕФА рамзий терма жамоасига киритилмади.
УЕФАнинг 2016 йилги рамзий терма жамоаси қуйидаги кўринишда:
Дарвозабон: Жанлуижи Буффон («Ювентус», Италия).
Ҳимоячилар: Серхио Рамос («Реал», Испания), Жерар Пике («Барселона», Испания), Жером Боатенг («Бавария», Германия), Леонардо Бонуччи («Ювентус», Италия).
Ярим ҳимоячилар: Андрес Иньеста («Барселона», Испания), Тони Кроос («Реал», Германия), Лука Модрич («Реал», Хорватия).
Ҳужумчилар: Лионель Месси («Барселона», Аргентина), Криштиану Роналду («Реал», Португалия), Антуан Гризманн («Атлетико», Франция).
Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)