BoxRec талқини бўйича Ўзбекистоннинг энг яхши профессионал боксчиси Қудратилло Абдуқаҳҳоров ҳамда ушбу рейтингда 3-ўринни эгаллаб турган Азизбек Абдуғофуров 7 январь куни Малайзиянинг Жохор шаҳрида бўлиб ўтадиган Johor International Boxing Championship 2017 (JIBC) бокс кечаси доирасида рингга кўтарилади. Бу ҳақда «Газета.uz» хабар бермоқда.
Мазкур бокс кечасида, шунингдек, Бирлашган араб амирликлари, Сингапур, Индонезия, Таиланд ва Филиппин вакиллари иштирок этади.
23 ёшли Қудратилло Абдуқаҳҳоров профессионал рингдаги фаолиятини 2015 йилнинг октябрь ойида бошлаган. Шу вақтгача у 8 та жанг ўтказиб, барчасида (5 тасида нокаут билан) зафар қучган. Навбатдаги жангида андижонлик боксчи 28 ёшли Филиппин вакили – Ромео Жакосалемга (18−13−1, 10 КО) қарши рингга кўтрилади.
Қудратилло Абдуқаҳҳоров BoxRec рейтинги бўйича вазнидан қатъи назар Ўзбекистоннинг энг яхши боксчиси саналади. Ўзбекистонлик спортчи 66,7 килограмм вазнгача Бутунжаҳон бокс федерацияси (WBF) ҳамда ёшлар ўртасида Бутунжаҳон профессионал бокс федерацияси (WPBF Youth) ҳамда Осиё бокс кенгаши (ABC) камарлари соҳиби саналади.
JIBC бокс кечасида Ўзбекистон шарафини яна бир боксчи – 24 ёшли Азизбек Абдуғофуров ҳимоя қилади. Профессонал рингда 3 та жанг ўтказиб, барчасида нокаут билан ғалаба қозонган Азизбек сўнгги беллашувида ўрта вазнда (72,6 кг) WBC версияси бўйича Осиё чемпиони камарини қўлга киртганди. Навбатдаги жангда Ўзбекистон вакили 34 ёшли индонезиялик Александер Бажави (41−2−4, 14 КО) билан куч синашади. Азизбек Абдуғофуров BoxRec талқини бўйича Ўзбекистоннинг энг яхши профессионал боксчилари орасида 3-ўринни эгаллаб турибди.
Маълумот учун, BoxRec профессионал боксчиларнинг натижасини янгилаб борадиган Британиянинг нуфузли ресурс ҳисобланади. Аксарият промоутер, менежер ва боксчилар ушбу рейтингга асосланади.
Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)