O‘zbekistonning eng yaxshi professional bokschilari Malayziyada ringga ko‘tariladi

BoxRec talqini bo‘yicha O‘zbekistonning eng yaxshi professional bokschisi Qudratillo Abduqahhorov hamda ushbu reytingda 3-o‘rinni egallab turgan Azizbek Abdug‘ofurov 7-yanvar kuni Malayziyaning Joxor shahrida bo‘lib o‘tadigan Johor International Boxing Championship 2017 (JIBC) boks kechasi doirasida ringga ko‘tariladi. Bu haqda “Gazeta.uz” xabar bermoqda.

Mazkur boks kechasida, shuningdek, Birlashgan arab amirliklari, Singapur, Indoneziya, Tailand va Filippin vakillari ishtirok etadi.

23 yoshli Qudratillo Abduqahhorov professional ringdagi faoliyatini 2015-yilning oktabr oyida boshlagan. Shu vaqtgacha u 8 ta jang o‘tkazib, barchasida (5 tasida nokaut bilan) zafar quchgan. Navbatdagi jangida andijonlik bokschi 28 yoshli Filippin vakili – Romeo Jakosalemga (18−13−1, 10 KO) qarshi ringga ko‘triladi.

Qudratillo Abduqahhorov BoxRec reytingi bo‘yicha vaznidan qat’i nazar O‘zbekistonning eng yaxshi bokschisi sanaladi. O‘zbekistonlik sportchi 66,7 kilogramm vazngacha Butunjahon boks federatsiyasi (WBF) hamda yoshlar o‘rtasida Butunjahon professional boks federatsiyasi (WPBF Youth) hamda Osiyo boks kengashi (ABC) kamarlari sohibi sanaladi.

JIBC boks kechasida O‘zbekiston sharafini yana bir bokschi – 24 yoshli Azizbek Abdug‘ofurov himoya qiladi. Professonal ringda 3 ta jang o‘tkazib, barchasida nokaut bilan g‘alaba qozongan Azizbek so‘nggi bellashuvida o‘rta vaznda (72,6 kg) WBC versiyasi bo‘yicha Osiyo chempioni kamarini qo‘lga kirtgandi. Navbatdagi jangda O‘zbekiston vakili 34 yoshli indoneziyalik Aleksander Bajavi (41−2−4, 14 KO) bilan kuch sinashadi. Azizbek Abdug‘ofurov BoxRec talqini bo‘yicha O‘zbekistonning eng yaxshi professional bokschilari orasida 3-o‘rinni egallab turibdi.

Ma’lumot uchun, BoxRec professional bokschilarning natijasini yangilab boradigan Britaniyaning nufuzli resurs hisoblanadi. Aksariyat promouter, menejer va bokschilar ushbu reytingga asoslanadi.

Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.