Юлдуз Усмонова Янги йил оқшомида иккита хусусий ва иккита давлат телеканалида чиқиш қилади

Ўзбекистон халқ артисти Юлдуз Усмонова Ўзбекистоннинг тўртта телеканалидаги Янги йилга бағишланган байрам дастурларида чиқиш қилади. Бу ҳақда Instagram’да хонанда номидан юритиладиган саҳифа маълум қилди.

Хабар беришларича, ЎзМТРК тизимига кирувчи «Ўзбекистон» телеканалидаги 31 декабрь куни эфирга узатиладиган «Байрам оқшоми» дастурида Юлдуз Усмонова 22:00 да «Ўзбекистон, севаман» қўшиғини куйлаб чиқади.

Шунингдек, ЎзМТРК тизимидаги бошқа бир телеканал — «Наво»да ҳам Янги йил эфири доирасида Юлдуз Усмонова иштирокидаги бир неча чиқишлар эфирга узатилиши маълум қилинмоқда.

Бундан ташқари, MY5 («Менинг юртим») телеканалидаги «Дийдор ширин» кўрсатувининг 31 декабрь куни 18:00 да бошланадиган сонида хонанда «Ялинганинг қани» номли қўшиғини, 21:00 да бошланадиган «Бутун олам бир манзилда» дастурида эса «Бум так, кўзимда ёш» қўшиғини куйлайди.

Юлдуз Усмонова 31 декабрь куни 23:59 да «Milliy TV» телеканалининг Янги йил оқшомини «Ўзингдан қўймасин, халқим» қўшиғи билан очиб беради; оқшом давомида унинг «Сенга», «Ўша, ўша» номли композициялари ҳам жаранг сочиши кутилмоқда.

Кўп йиллардан бери телеканалларда ва давлат тадбирларида чиқиш қилмаётган Юлдуз Усмонова 5 декабрь куни Шавкат Мирзиёевнинг Ўзбекистон Президенти сайловидаги ғалабаси шарафига ташкиллаштирилган тантанали маросимда Ўзбекистон мадҳиясини куйлаган эди.

Кейинроқ у Конституция кунига бағишланган ва Ўзбекистон Президенти Шавкат Мирзиёев иштирок этган байрам концертида қўшиқ куйлаб чиқди.

Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.