Охирги ўринда — Озодбек Назарбеков: 2016 йилнинг энг қиммат концерт дастурлари

Тошкентдаги «Истиқлол» санъат саройи 2016 йилда ҳам кўплаб концерт дастурларига мезбонлик қилди. Журналист Феруз Муҳаммад санъат саройидаги чипталарнинг касса нархлари асосида йилнинг энг қиммат концертлари рейтингини тузди.

5-ўрин. Озодбек Назарбековнинг концерти

Келаси йили концерт бермаслигини эълон қилган Ўзбекистон халқ артистининг 2016 йилги дастури 10—20 апрель кунлари, «Меҳринг сабаб» номи билан бўлиб ўтди. Концертнинг кассадаги энг арзон чиптаси 15 минг сўмдан, энг қиммати эса 140 минг сўмдан сотилди.

4-ўрин. Ботир Қодировнинг концерти

Хонанда Ботир Қодировнинг 1—6 ноябрь кунлари бўлиб ўтган концерти чипталари қуйидагича нархларда сотилди: энг арзон чипта — 10 минг сўм, энг қиммати — 150 минг сўм.

3-ўрин. Лоланинг концерти; Райҳоннинг концерти; «Менинг Тошкентим» мюзикли

23—27 февраль кунлари бўлиб ўтган Райҳоннинг яккахон концерти чипталари 30 минг сўмдан бошланиб, 180 минг сўмгача бўлган нархда сотилди.

Бош ролларини машҳур актёрлар ва эстрада хонандалари ижро этган ва 24 сентябрь куни қўйилган «Менинг Тошкентим» мюзикли чипталари 8 минг — 180 минг сўм оралиғида сотувга чиқарилди.

Хонанда Лоланинг 21—23 ноябрь кунлари бўлиб ўтган ва саҳнада 2016 йилнинг жаҳон бўйича энг яхши боксчиси Ҳасанбой Дўстматов ҳам чиқиш қилган концертига энг арзон чипталар 25 минг сўмдан, қиммати эса 180 минг сўмгача нархда сотилди.

2-ўрин. Жаҳонгир Отажоновнинг концерти; Шаҳзоданинг концерти

Хонанда Шаҳзоданинг 1—7 май кунлари бўлиб ўтган концерт дастури учун энг арзон чипта нархи 15 минг сўм, энг қиммати эса 200 минг сўм бўлди.

Жаҳонгир Отажоновнинг 28—29 октябрь кунлари ташкил этилган жонли ижродаги концертининг энг арзон чиптаси — 10 минг сўм, энг қиммати эса 200 минг сўмдан сотилди.

1-ўрин. Валерий Меладзенинг концерти; Ирина Аллегрованинг концерти

Россиялик хонандалар иштирокидаги концертлар «Истиқлол»да 2016 йилда ташкил этилган томоша тадбирлари орасида чиптаси энг қимматлари бўлди.

Валерий Меладзе фақат бир кун — 1 октябрда жонли ижрода концерт дастурини тақдим этди. Дастурнинг энг арзон чиптаси 100 минг, энг қиммати эса 1,2 миллион сўмдан сотилди.

12 декабрь куни россиялик бошқа хонанда — Ирина Аллегрова концерт берди. Унинг концертида ҳам энг арзон чипта 100 минг, энг қиммати эса 1,2 миллион сўмдан сотувга чиқарилди.

Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.